Davlatimiz rahbari topshirig`iga asosan tuzilgan Respublika ishchi guruhi o`z faoliyatini Namangan viloyatida davom ettirmoqda.
Prezident Administrasiyasi, Xalq qabulxonasi hamda tegishli vazirlik va idora vakillaridan tashkil topgan ishchi guruhi viloyatning Kosonsoy, To`raqo`rg`on, Chortoq va Yangiqo`rg`on tumanlarida 254 ta mahalla aholi muammolarini hal qilish, “mahalla ettiligi” hamkorligini ta`minlash, yoshlar bilan ishlash, aholi bandligini ta`minlash tizimini samarali tashkil etish yo`nalishlarida qator amaliy ishlar olib borilmoqda.
Aholi bandligini ta`minlash maqsadida ushbu hududlarda eng qisqa muddatlarda 52 mingga yaqin yangi ish o`rinlarini yaratish rejalashtirilgan. Xususan, ish o`rinlari investisiya loyihalarini ishga tushirish, xizmat ko`rsatish sohalarini rivojlantirish, qishloq xo`jaligi hamda qurilish sohasida yaratilishi ko`zda tutilgan.
Shuningdek, oilaviy tadbirkorlikni rivojlantirish maqsadida “Har bir oila – tadbirkor” dasturi doirasida mahalladagi hokim yordamchilari tavsiyasi bilan 35 nafar fuqaroga 770 mln so`mdan ziyod imtiyozli kredit mablag`lari ajratilib, tadbirkorlik faoliyati yo`lga qo`yildi.
Mavjud bo`sh ishchi o`rinlariga 845 nafar fuqaro joylashtirildi, 524 nafari kasb-hunarlarni o`qitishga yo`naltirildi, 291 ta tadbirkorlik sub`ektlari tashkil etildi.
Bundan tashqari, viloyatda er olish, o`z-o`zini band qilish istagi bo`lgan 6 ming 24 nafar yoshlarga 2,1 ming gektar er maydonlari ajratish belgilab olindi. Bu borada tuman sektor rahbarlari, yoshlar agentligi bo`limlari, “mahalla ettiligi” bilan birgalikda er olish istagi bo`lgan yoshlar ro`yxati shakllantirildi hamda suv ta`minoti yaxshi, aholiga yaqin bo`lgan ekin er maydonlaridan yaxlit konturlar tanlandi.
Aholi kayfiyatiga ta`sir qiluvchi muammolarni o`rganish va ularni hal etish maqsadida Respublika ishchi guruhi tomonidan 4 710 ta xonadon hamda 179 ta ijtimoiy soha ob`ektlari manzilli o`rganildi. O`rganishlar jarayonida aholidan kelib tushgan jami 680 ta muammoli masalalarning 479 tasi hududdagi mas`ullar bilan birgalikda joyida hal etildi.
Jumladan, mahallalardagi ichki yo`llarning holatini yaxshilash yo`nalishida 13,2 km uzunlikdagi ichki yo`llar shag`allashtirildi, 1,7 km qismiga beton qoplamasi yotqizildi, 5,4 km uzunlikdagi piyodalar yo`lagi ta`mirlandi.
Elektr ta`minotini yaxshilash yo`nalishida 26 ta transformator ta`mirlandi, 47 ta yaroqsiz simyog`och temir-beton ustunlarga almashtirildi va qo`shimcha 92 ta yangi ustun o`rnatildi, 6,8 km uzunlikdagi elektr SIP kabellar tortildi, 287 ta tungi yoritish chiroqlari o`rnatildi.
Tanlab olingan tumanlar bo`yicha 42 mingdan ziyod aholi tibbiy ko`rikdan o`tkazildi va uning natijalariga ko`ra, kasallik aniqlangan 7,5 ming bemorni davolash ishlari tashkillashtirildi. Jumladan, ular tuman, viloyat va Respublika shifoxonalariga yotqizildi. Shu bilan birga, 6 783 nafari bepul dori-darmonlar bilan ta`minlandi.
Ramazon oyining ma`naviy-ruhiy hayotimizdagi alohida o`rni va ahamiyatini inobatga olgan holda 79 ta ma`naviy-ma`rifiy tadbirlar tashkil etildi, 904 ta kam ta`minlangan va ehtiyojmand oilalar hamda 728 ta nogironligi bor shaxslar bilan yashovchi oilalar uchun ehson iftorliklari o`tkazildi.
Jismoniy tarbiya va sport bilan shug`ullanadiganlarning sonini oshirish uchun zarur sharoitlar yaratish maqsadida “Besh tashabbus olimpiadasi” doirasida sportning futbol, engil atletika, stol tennisi, vorkaut kabi turlari bo`yicha mahallalarda musobaqalar o`tkazilmoqda.
Maktablarda ma`naviy-ma`rifiy ishlar samaradorligini oshirish, o`quvchilarning bo`sh vaqtlarini mazmunli tashkil etish maqsadida kitobxonlik, estrada, teatr, sayoxat tadbirlari yo`nalishida to`garaklar, milliy maqom, folklor-etnografik yo`nalishlarda o`quvchilarning havaskorlik ansambllari tashkil etildi.
Respublika ishchi guruhi tomonidan ishlar davom ettirilmoqda.
