Jinoyat ishlari bo`yicha Denov tuman sudi raisi yo`l transport hodisasiga uchragani, buning oqibatida u bilan bitta avtomashinada bo`lgan advokat halok bo`lib, o`zi esa u turli darajada tan jarohat olgani haqida ommaviy axborot vositalari va ijtimoiy tarmoqlarda xabarlar tarqaldi.
Sudyalar oliy kengashi matbuot xizmatining ma`lum qilishicha, kengash tomonidan xizmat tekshiruvi o`tkazilib, natijada tuman sudi raisining vakolatlari muddatidan ilgari tugatilgani qayd etilsa-da, turli talqin va bashoratlarga berilishlar ham kuzatilmoqda.
"Xususan, holat yuzasidan tergov ishlari yakuniga etmaganiga qaramay sud raisning vazifasidan ozod etilganini - barvaqt xulosaga kelish, yoki fojea sodir bo`lgan paytda avtomashina boshqaruvida sudya (sud raisi) bo`lganiga oid axborotlar ham yo`q emas.
Qayd etish joizki, joriy yilning 9 mart kuni Denov tumanida yuz bergan YTH bo`yicha xizmat tekshiruvi fojeaga sabab bo`lgan omillar va bu jarayonda sud raisining xatti-harakatlari doirasida o`tkazilgan bo`lib, unda Sudyalar odobi kodeksi talablari buzilgani aniqlangan.
Xizmat tekshiruvi xulosasi Surxondaryo viloyati sudlari sudyalar malaka hay`atida muhokama etilib, tuman sudi raisning vakolatlarini muddatidan ilgari tugatish haqida qaror qabul qilingan.
Mazkur qarorga nisbatan berilgan shikoyatlar esa rad etilgan.
Ushbu chora intizomiy jazo xarakterida bo`lib, tergov ishlariga daxli yo`q.
Pirovardida, og`ir oqibatga olib kelgan YTHning aybdorini aniqlash tergov organi vakolatiga tegishli ekani yana bir bor qayd etiladi", deyiladi rasmiy munosabatda.
