“Olot” chegara bojxona posti orqali 50 ming AQSH dollarini O‘zbekiston Respublikasidan yashirincha olib chiqib ketishga bo‘lgan urinish bartaraf etildi. Bu haqda Bojxona qo‘mitasi matbuot xizmati xabar qildi.
Buxoro viloyati bojxona boshqarmasining “Olot” chegara bojxona postiga piyoda sifatida kirib kelgan fuqaro tegishli tartibda bojxona nazoratidan o‘tkaziladi. Dastlab bojxona xodimining og‘zaki so‘rovida fuqaro yonidagi 5000 AQSH dollari hamda 38 mln so‘m miqdordagi milliy valyutalarni taqdim etadi. Ushbu naqd pullar qayta hisob kitob qilingan vaqtda esa, 5 000 AQSH dollari deya taqdim etilgan valyutalar aslida, 10 000 AQSH dollari, milliy valyutalar esa, 38 mln so‘m emas balki, 61 580 000 so‘m ekanligi aniqlandi.
O‘tkazilgan bojxona ko‘rigi davomida esa fuqaro yana 30 ming AQSH dollarini oyoq kiyimi ostiga va 10 ming AQSH dollarini yon cho‘ntaklariga berkitib, olib chiqishga uringanligi tasdiqlandi.
Hozirda fuqaroning mazkur xatti-harakati yuzasidan tegishli tartibda hujjatlar rasmiylashtirilib, jami 50 ming AQSH dollari va 61 580 000 so‘m miqdoridagi milliy valyutalar holatga oydinlik kiritilgunga qadar vaqtincha saqlovga olingan.
Eslatib o‘tamiz, jismoniy shaxslar tomonidan ekvivalenti 100 mln so‘mgacha bo‘lgan naqd valyuta mablag‘larini ixtiyoriy tarzda yo‘lovchi bojxona deklaratsiyasida ko‘rsatib, O‘zbekiston Respublikasidan olib chiqishga ruxsat etiladi.
