Jahon sog‘liqni saqlash tashkilotining Yevropa mintaqaviy byurosi direktori Xans Klyuge ko‘hna qit’a va Markaziy Osiyoning 53 mamlakatida mavsumiy grippdan yiliga 72 mingga yaqin kishi vafot etayotganini ma’lum qildi, deya xabar bermoqda SSV Matbuot xizmati.
“Ushbu o‘lim holatlarining aksariyatini oldini olish mumkin, — deydi u. — Buning uchun, eng avvalo, aholining immuniteti zaif qatlami xastalikka qarshi vaksinalar bilan “himoyalanishi” kerak”.
Qayd etilganidek, kuz-qish mavsumida gripp va koronavirusga chalinish xavfi ortadi. Ushbu kasalliklar katta yoshli kishilar, homilador ayollar va immuniteti zaif hamda surunkali kasalliklari bor odamlarda og‘ir asoratlar bilan o‘tishi mumkin.
Shu bois mazkur xavf guruhiga mansub qatlam bu davrda o‘z sog‘ligiga yanada e’tiborli bo‘lishlari lozim. Buning uchun JSST 5 ta eng asosiy ehtiyot chorasiga amal qilishni tavsiya qiladi.
1.Emlanish — mavsumiy respirator infeksiyalardan himoyalanishning eng maqbul yo‘li.
2.Gripp, O‘RVI, SOVID-19ga chalinganlar shifokorga murojaat qilishlari va imkon qadar uyda qolib davolanishlari zarur.
3.Jamoat joylarida niqob taqish — sizni xastalikni yuqtirishdan asraydi.
4.Shaxsiy gigiyena qoidalariga amal qilib, qo‘llarning tozaligiga rioya qilish muhim.
5.Xonalarni tez-tez shamollatib turish tavsiya etiladi. Bu viruslarning ko‘payishi va keng tarqalishiga to‘siq bo‘ladi.
Doktor Xans Klyugening ta’kidlashicha, ana shunday holatlarni inobatga olib, bu yil JSST tomonidan “Sizga qanday xavf tahdid solayotganini o‘zingizdan ko‘ra hech kim yaxshiroq bilmaydi” shiori ostida targ‘ibot kampaniyasi e’lon qilindi.
