Ijtimoiy tarmoqlarda Qozog‘iston-O‘zbekiston chegarasida o‘zbekistonlik haydovchi pichoqlangani aks etgan video tarqaldi.
Holat yuzasidan Transport vazirligi rasmiy ma’lumot taqdim etdi.
Ma’lum qilinishicha, 2024 yil 3 noyabrda O‘zbekiston Respublikasi va Qozog‘iston Respublikasi chegarasidagi (Qozog‘istonning Turkiston viloyati, Sariyog‘och tumani) “S.Najimov – Kazigurt” nazorat-o‘tkazish punktida sodir bo‘lgan hodisa, shuningdek, "Kurmangazi" chegara o‘tish punktida Astraxan shahri (Rossiya) yo‘nalishida yuk avtotransport vositalarining to‘planib qolish holati yuzasidan Qozog‘iston Respublikasi Transport vazirligi va boshqa tegishli idoralari bilan muzokaralar olib borildi.
Muzokaralarda qozoq tomoni o‘zbek haydovchisiga jarohat yetkazish bilan bog‘liq hodisa tegishli organlar tomonidan nazoratga olingani, hozirda Turkiston viloyati, Sariyog‘och tuman politsiya bo‘limi tomonidan tergov surishtiruv ishlari olib borilayotgani va Qozog‘iston Respublikasi JKning 293-moddasi bilan ish qo‘zg‘atilganligi, gumondor shaxs Qozog‘iston fuqarosi qidirilayotganligini ma’lum qildi.
"Kurmangazi" chegara o‘tish punktida avtotransport vositalarining to‘planib qolishi holatini oldini olish bo‘yicha esa qozoq tomoni barcha tegishli choralarni ko‘rmoqda.
