Ba`zida, turib-turib nimanidir o`zgartirishni istab qolamiz. Ayniqsa, bahor va kuz faslida bu his qayta jonlandigandek go`yo. Sizda ham shunday bo`ladimi? Keling, biroz yangilik qilish uchun tashqi ko`rinishimizga o`zgartirish kiritamiz. Ishni sochlardan boshlaymizmi? Stilistlarning bu boradagi takliflari bisyor.
- Bo`yash
Stilistlar qora va malla ranglar urf bo`lishini ta`kidlashmoqda. Ammo moda ortidan quvishdan avval qora sochlar ayolning yoshini katta ko`rsatishini ham inobatga olish darkor. Shuning uchun bu rang bilan «muomala» qilganda ehtiyot bo`lish lozim. Bundan tashqari, mutaxassislar soch rangi tabiiysidan ikki tongagina farqlanishi lozimligini uqtirishadi. Aks holda u teri, qosh va kipriklar bilan uyg`unligini yo`qotib, notabiiy ko`rinish kasb etadi. Tashqi ko`rinishni o`zgartirishga kirishgan ayollarning birinchi qiladigan ishi soch bo`yash desak, adashmagan bo`lamiz. Bundan avval esa har bir ayol o`z rang toifasini bilib olishi lozim. Xo`sh, siz kimsiz — bahormi, yoz, kuz yoki qish? Buni esa teri, qosh, yuz va sochning tabiiy rangiga qarab aniqlash mumkin.
Bahor tipidagi ayollar. Ularning ko`zlari odatda yashil, moviy yoki yong`oq rang, sochlari malladan qo`ng`ir tusgacha, terisi sarg`ish tusda bo`ladi. Ular sochlarini to`q malla, och qo`ng`ir yoki oltinrang sariqqa o`zgartirishi mumkin. Shuningdek, och jigarrang va shokolad tusdagi sochlar mos tushadi. Biroq qizg`ish va yorqin sariq ranglar tashqaridan rangpar ko`rsatib qo`yishi mumkin. Shuningdek, kulrang va qora sochlar ham yuz rangi bilan uyg`unlik kasb etishi mumkin.
Yoz tipidagi ayollar. Bu guruhga mansublar kulrang yoki moviy ko`zli, soch rangi sarg`ishdan qo`ng`irgacha, terisi esa pushti tusli bo`ladi. Oppoq teri ostidagi mayda tomirlar ko`rinib turadi. Ular kulrang, sarg`ish-kulrang va platino ranglarini tanlamasliklari lozim. To`q rangli bo`yoqlardan foydalanish ham tavsiya etilmaydi. Eng yaxshi tanlov — bug`doyrang bo`yoqlar.
Kuz tipidagi ayollarning ko`zlari qoradan yashilgacha, sochlari malladan qo`ng`irgacha bo`lishi mumkin. Ular soch uchun jigarrang, qo`ng`ir, yong`oqrang, mis tusli va shokolad rangidagi bo`yoqlardan foydalanishlari mumkin.
Qish tipidagi ayollar terisi oq, soch va qoshlarining tabiiy rangi esa qora bo`lishi bilan farqlanadi. Ularga baqlajon, sovuq malla ranglar to`g`ri kelishi mumkin.
2. Laminasiyalash
Bu sochni maxsus vosita yordamida tekis va jilokor qilish usuli bo`lib, ayniqsa, sovuq mavsumda itoatsiz sochlar uchun qo`l keladi. Muolaja taxminan 30 daqiqa davom etib, vosita sochning ustki qavatida yupqa plyonka hosil qilib, uni sovuq havo ta`siridan himoyalash xususiyatiga ham ega. Shuningdek, sochga sezilarli hajm bergani uchun siyrak sochli ayollarga tavsiya etiladi. Laminasiyalangan soch 3-6 hafta davomida jilokorligini saqlab turadi.
3. Soch ulatish
2016 yilning kuzida ham uzun sochlar urfda qolmoqda. Ammo bu kalta sochli go`zallar kayfiyatiga sira ta`sir ko`rsatmasligi lozim. Sochni «o`stirish» jarayonini 1-2 soatda amalga oshirish imkoniyati bor, axir. Ulangan sochlarni bemalol yuvish, tarash, jingalak qilsa bo`ladi.
4. Jingalak qilish
Aksariyat sochi tekis ayollar maftunkor jingalaklar haqida orzu qilishadi. Jingalaklar kun davomida shaklini yo`qotmasligi uchun jingalak qilishdan avval sochni yuving, ammo turli kondisioner va balzamlardan foydalanmang. Ular turmak sifatining buzilishiga olib keladi. Jingalaklovchi moslama (ployka)ning kichik diametrlisi jingalaklar chiroyli va shaklini uzoqroq saqlashiga yordam beradi.
Kimyoviy vositalar yordamida jingalaklashda stilist sochga maxsus kimyoviy suyuqlik surtib, bigudiga o`rab qo`yadi. Ma`lum muddatdan so`ng soch yuvilib, quritiladi. Jingalaklashning kimyoviy usulini tanlaganlar muolajadan avval sochni bo`yash mumkin emasligini yodda saqlashlari lozim. Sochning tuzilishaga qarab bunday turmak 3 oygacha o`z ko`rinishi saqlab turishi mumkin.
Bio jingalaklashning kimyoviy jingalaklashdan farqi maxsus vositaning kimyoviy emas, tabiiy ekanligidadir. U tabiiy oqsil asosida tayyorlanadi. Stilistlarning ta`kidlashicha, ushbu suyuqlik tarkibidagi vitaminlar sochni mustahkamlashga yordam beradi.
5. Ombre usuli
Sochimni och rangga bo`yasammi, yoki to`qroqgami deb o`ylanayotgan sanamlar uchun stilistlar har ikkisini o`zida jamlay olgan yangi usulni taklif qilishmoqda. Bu usulni sochni kimyoviy kuydirish (melirovanie) bilan adashtirmang. Brondlashda ko`pgina o`zaro uyg`un ranglardan foydalanib, sochni to`qdan ohista ochiga o`tiladi. Bunda soch maxsus texnologiya asosida bir necha marotaba bo`yaladi.
6. Qaynoq qaychilar muolajasi
Bu usul odatda soch gullashini bartaraf etishda qo`llaniladi. Chunki yuqori harorat ta`sirida soch uchi kuydiriladi. Undagi suyuqlik, vitaminlar va oqsillar esa saqlanib qolinadi. Jarayon biroz murakkab bo`lib, mutaxassis har tutamga alohida ishlov bergani uchun soch uzunligiga deyarli putur etmaydi. Natijani 2-3 muolajadan so`ng ko`rishingiz mumkin bo`ladi.
7. «Yuvish»
Sochni bo`yashga bo`yab qo`ydingiz-u, natija ko`ngildagidek chiqmadi. Xo`sh, nima qilish kerak? Axir ko`ngilni g`ash qiluvchi rang ustidan boshqa rangga bo`yash qanday oqibatlarga olib kelishi noma`lum. Bunday mushkul vaziyatda rangni «yuvish» yordam beradi. Mutaxassis maxsus suyuqlikni sochga surtib, tutamlar bir xil «yuvilishi»ni ta`minlashni o`z nazoratiga oladi. Soch rangi ikki tonga ocharib, vosita yuvib tashlanadi. Va xohishingizga ko`ra shu zahoti yoki bir nech kundan keyin boshqa rangga bo`yashingiz mumkin. Ha aytganday, amaliyot kirlangan sochda o`tkazilishini inobatga olib, kamida ikki kun davomida sochni yuvmaslik tavsiya etiladi.
KAMOLA tayyorladi.
