O‘zbekiston Superligasi 22-turidagi “Buxoro” klubiga qarshi yirik hisobdagi mag‘lubiyatdan so‘ng “Navbahor” jamoasi rahbariyati bosh murabbiy Sergey Lushanni lavozimidan ozod qildi. Bu haqda klub matbuot xizmati xabar berdi.
Bildirilishicha, 52 yoshli mutaxassis 2024 yilning yozida Samvel Babayannig iste’fosidan so‘ng “Navbahor” klubi bosh murabbiyi sifatida tayinlangan. Shundan so‘ng, Namangan klubi bilan O‘zbekiston kubogi final bosqichiga chiqib, finalda “Andijon”ga imkoniyatni boy bergan.
"Biz Sergey Ivanovichga “Navbahor”dagI faoliyati uchun o‘z minnatdorchiligimizni bildirgan holda, keyingi faoliyatida omad yor bo‘lishini tilaymiz”, deyiladi klub xabarida.
Qayd etish joiz, Sergey Lushan Buxoroda uchrashgan yirik hisobdagi mag‘lubiyatdan so‘ng o‘z futbolchilaridan norozi ekanligini va ayrim futbolchilarning harakatlari shubhali tuyilgani haqida gapirgan.
