Ijtimoiy tarmoqlarda Namanganda qora rangli Gentra haydovchisi piyodani urib, voqea joyidan qochgani aks etgan videolavha tarqaldi.
Viloyat IIB Matbuot xizmatiga ko‘ra, holat joriy yilning 11 fevral kuni soat 06:40 larda sodir bo‘lgan. Noma’lum shaxs o‘zining boshqaruvida bo‘lgan Gentra rusumli avtomashinasida Namangan shahar A.Temur ko‘chasida harakatlanib, yo‘lni kesib o‘tayotgan piyoda Namangan shahrida yashovchi, 1958 yilda tug‘ilgan fuqaroni urib yuborib, hodisa joyidan yashiringan.
Natijada, piyoda olgan tan jarohati sababli voqea joyida vafot etgan.
Mazkur holat yuzasidan Namangan shahar IIB huzuridagi Tergov bo‘limi tomonidan JKning 117-moddasi 2-qismi va 266-moddasi 2-qismi bilan jinoyat ishi qo‘zg‘atilgan.
Noma’lum haydovchini topish bo‘yicha o‘tkazilayotgan tezkor qidiruv ishlari yuzasidan qora rangli Gentra rusumli avtomashinalar mutaxassislar tomonidan tekshirilib, tekshiruv yakunlangandan so‘ng ruxsat berilmoqda.
