2025 yil 3 mart kuni Toshkent shahri jinoyat ishlari bo‘yicha Yakkasaroy tuman sudida 9 yoshli qizga shahvoniy shilqimlik qilgan shaxs ustidan sud bo‘lib o‘tdi. Darakchi.uz sud hujjatini o‘rgandi.
Hujjatga ko‘ra, 24 yoshli D.M. 2025 yil 16 fevral soat 13:30 da Toshkent shahri Yakkasaroy tumanida joylashgan rassomchilik to‘garagi maktabida voyaga yetmagan 9 yoshli qizning qaddi-qomatini tavsiflab, uni yelkalarini ushlab, uqalab, qo‘llarini ushlab, quchoqlab, unga shahvoniy shilqimlik qilgan.
Sud majlisida huquqbuzar D.M. aybiga to‘liq iqrorlik bildirib, u rassomchilik to‘garagi maktabida o‘qituvchi ekanini, qiz uning o‘quvchisiligini aytgan. U o‘quvchisi topshiriqlarni bajarib, yaxshi natija ko‘rsatgani sababli quchoqlaganini ta’kidlagan. Erkak qilgan ishidan afsusdaligini, bunday holat boshqa takrorlanmasligini bildirib, suddan unga nisbatan yengillik berishni so‘ragan.
Sud majlisida jabrlanuvchining qonuniy vakili T.B. ko‘rsatuviga ko‘ra, 16 fevral kuni qizi uyga kelganda unga o‘qituvchisi D.M. dars vaqtida shilqimlik qilib, uni quchoqlab olganini aytgan. Shundan so‘ng T.B. "102" ishonch telefoniga qo‘ng‘iroq qilib, D.M.ga nisbatan qonuniy chora ko‘rishni so‘rab, ariza bilan murojaat qilgan.
Sud D.M. Ma’muriy javobgarlik to‘g‘risidagi kodeksning 41−1 -moddasi 1-qismida nazarda tutilgan (Shahvoniy shilqimlik) huquqbuzarlikni sodir qilgan deb topdi. Unga nisbatan 5 (besh) sutka ma’muriy qamoq jazosi tayinlandi.
