Shifokorlar tunda bolaning qay holatda uxlashiga qarab, uning xarakteri va ruhiyatidagi o`zgarishlarni bilish mumkin, deyishadi. Farzandingizning o`y-xayollari nimalar bilan bandligini bilishni istasangiz, diqqat qiling.
Yuqoriga qarab yotsa...
Kurak bilan yotgan holatda, qo`l-oyoqlar yon tarafda joylashgan. Ba`zida qo`llar boshdan yuqoriga ko`tarilgan ham bo`ladi. Bolakay boshini yon tarafga yoki to`g`ri ushlagancha tutadi. Bu holat bola ruhiyatidagi xotirjamlikni bildiradi. Fe`l-atvoriga ko`ra og`ir-bosiq, yaqinlarining mehri, e`tiborini sezib turadi.
G`ujanak bo`lib olsa...
Tizzalar birlashgan, qo`l bosh ostiga qo`yilgan, bola huddi bir nimadan xavfsiraganday (yoki sovuqqotayotgandek) g`ujanak bo`lib olgan. Ustiga yopilgan ko`rpa bo`yingacha etadi. Ushbu holat farzandingizni nimadir tashvishga solayotgani, o`ylantirayotgani yoki unga azob berayotganini bildirishi mumkin. Oilada nosog`lom muhit bo`lganida ham bola o`zini shu tariqa himoyalashga urinadi. Bu ong ostida sodir bo`lgani uchun ham uyqusida ro`y beradi.
Qorin bilan uxlasa...
Qoringa yotgan holatda, qo`l-oyoqlarini yon tarafga joylashtirgan bolakay ta`sirchan, kayfiyati o`zgaruvchan bo`ladi. Uni xafa qilish juda oson. Ammo kichik narsalardan ham xursand bo`lishni biladi. Agar unga qattiqroq tanbeh bersangiz, keyinchalik o`z qobig`ida o`ralib qolishi ham mumkin.
Tizzalar birlashgan...
Ko`p bo`lmasada, bu ko`rinishda uxlaydigan bolalar ham uchrab turadi. Tizzalarni birlashtirib, ularni yuqoriga ko`targancha uxlash orom vaqti sodir bo`ladi. Tabiiyki, bolaning o`ziga sezilmaydi. Odatda bunday holat injiq, fe`li murakkabroq bolalarda kuzatiladi. Bunday bolalarni biror nimaga majburlab bo`lmaydi. Yaxshi gap bilangina yo`lga solish mumkin.
Yonboshda uxlash ...
Uyqu uchun qulay ko`rinishlardan biri. Agar farzandingiz yonboshida uxlashga odatlangan bo`lsa, ruhiyatidan havotirlanmasangiz ham bo`ladi. Bolakay xotirjam, o`zini yaxshi xis qilmoqda. Sog`ligida ham hech qanday muammo yo`q. Ammo kezi kelganida o`ziga kerakli bo`lgan mehr va e`tiborni so`rashga iymanadi. Ana shu taraflariga diqqat qiling.
Boshqa ko`rinishlari ...
- Farzandingiz ustiga yopilgan ko`rpani huddi atay qilinganidek oyoqlariga o`rab oladi. Bu uning norozilik kayfiyatini bildirishi mumkin.
- Qo`l-oyoqlarini tarang qilib oladiki, salgina bo`shalishiga ham imkon bermaydi. Ahamiyat bering, farzandingiz asabiy bo`lib qolmaganmi?!
- Іamisha qo`l kaftini musht qilib oladi. Shartli refleks ta`sirida hosil bo`lgan jarayon bolakayning to`palonchi ekanligini bildirishi mumkin.
- Yumshoq o`yinchog`i yoki qo`g`irchog`i bilan birga uxlashga odatlangan bolalarga e`tibor etishmaydi. Agar bu holat farzandingizda kuzatilsa, unga ertak aytib bering, uxlab qolgunicha yonida bo`ling.
