O`zbek shou-biznesining nokamtar vakillari reytingi e`lon qilindi(Foto)

O`zbek shou-biznesi vakillari ichidan 17 nafar eng nokamtarlar tanlab olindi. 

“Sayyod.com” nashri ijtimoiy tarmoqlar orqali “Nokamtarlar xit-paradi” uchun qo`yilgan so`rovnoma natijalarini e`lon qildi, deb yozadi “Daryo”. Reyting odamlar tomonidan bildirilgan, shou-biznes vakillaridan anonimlik sharti bilan olingan hamda sayt fikrlarini o`zida birlashtirgan.

17-o`rin: Munisa Rizaeva.
Eng oxirgi o`rinni egallagan bu xonandani nokamtarligini Instagram sahifasiga qo`yadigan selfilari va suratlarda libosi yoki o`zini oynada suratga olib tushaverishi, gullaru to`ydagi liboslarini ham ko`z-ko`z qilish bilan sharhlandi.

16-o`rin: Sayyod.
Mazkur xit-paradda «Sayyod.com» rahbariyatiga ham xalqning nokamtarlik unvoni berilgani sababini Instagram’ga qo`yiladigan sovg`alar va shirinliklar suratini reklama deya baholashdi.

Reytingning 15-o`rnidan aktrisa Muqaddas Sa`dullaeva joy oldi.
O`zini suratga olishni xush ko`rishi bilan aktrisaga bu o`rin nasib etgan bo`lsa ne ajab…

14-o`rin: Sardor Rahimxon
Asosan do`stlari davrasidagi dasturxon atrofida suratga tushishni yoqtiradigan xonandani shu suratlarini Instagram’ga joylagani uchun nokamtar sanashgan ko`rinadi.

13-o`rin: Bastakor Eldor Qayumov
O`z kasbidan «yulduzlikka intilish» sifatida ko`proq foydalanib kliplarda faolligi oshgan bu ijodkor xit-paradning shu o`rniga loyiq deb topildi.

12-o`rin: Zarina Nizomiddinova
Selfi tushishni va qomatini oynadan suratga olishni sevadigan Zarina ham nokamtarlik reytingidan joy oldi.

11-o`rin: Halima Ibragimova
Ayol qiziqchilardan hozirda yagona bo`lgan Halima Ibragimovaga ovoz berganlar xuddi amerikalik qora tanli reperlar kabi bo`yniga arqondek va unga ilingan lagandek kulonli tillolar taqib va umuman tillolardan haddan ziyod foydalanadi degan fikrga kelgan.

10-o`rin: Kaniza
Kanizaning Instagram’dagi selfimaniyasi va sovg`alaru gullar bilan tushgan suratlarini joylashi uning ushbu o`ringa loyiq deb topilishiga sabab bo`ldi.

9-o`rin: Jasur G`oyipov
Bu xonandaning ijod davomidagi «Men bu men!» shiori bilan o`ta nokamtar fikrlariyu intervyudagi osmon-osmon gaplari uni aynan shu o`ringa muhrladi.

8-o`rin: Shohjahon va Zohirshoh Jo`raevlar
Shohjahonni uzuklaridan to imiji va albatta «qonuniylashtirilgan» eksklyuziv liboslari reytingning shu o`rniga sabab bo`ldi. Ukasi Zohirshoh esa ijodidan ko`ra quruq gaplari bilan shu o`ringa mos ko`rinadi.

7-o`rin: Asilbek Ne`matov
Nashrning ta`kidlashicha, u o`zini Himolay tog`lariga qiyoslaganini aytib tasvirlangan videodanoq «kamtarlik» darajasi qay tarzda ekanini bilish qiyinmas.

6-o`rin: Sarvar Isaev
Bu rejissyor so`nggi paytlar o`zi suratga olgan klip va reklamalarida hadeb o`zini reklama qilaverishidan nokamtarlik darajasi mana shu o`ringa chiqdi, deydi «Sayyod.com».

5-o`rin: Shahzoda Muhammedova
Uning bu o`rinni egallashiga ijtimoiy tarmoqlardan yig`ilgan ko`plab ovozlar sabab bo`ldi. Aktrisa, modeler, dizayner va xonanda… xuddi «Kavkaz asirasi» komediyasidagi Nina qahramonidek. O`zi so`nggi payt o`sha qahramonga o`xshab ham ketyapti, deydi muallif.

4-o`rin: Mirtohir Mirg`ulomov
«Sb.uz» saytining rahbari so`nggi paytlar boshlovchiligu, «men ham bir ko`rinay» degan epizodik aktyorlikkacha urinayotganligi ta`kidlanmoqda.

3-o`rin: Akbar Atamuhammedov va uning «Sado» guruhi
Kasting haqida joylagan e`lonida u o`z guruhini Afsonaviy deb nomlagani xit-paradining yuqori pog`onasidan joy olishiga sabab bo`ldi.

2-o`rin: Klipmeyker Narimon Sultonxo`jaev
Bosh rolni o`zi ijro qilish sharti bilan kliplarni suratga oladigan klipmeyker Narimon Sultonxo`jaev bu borada so`zsiz shu o`ringa loyiqligi sir bo`lmasa kerak. Klipiga rafiqasiniyam, farzandiniyam va hattoki dodasiniyam olib chiqdi, deydi «Sayyod.com».

1-o`rin: Ahad Qayum
Nashr ta`kidlashicha, tinmay suratga tushadigan va kitoblarini suratlari bilan to`ldirgani etmagandek alohida kalendarlar chiqaradigan bu shoir o`zini rejissyorlikkayam urgan va hattoki ashula aytib, klip ham suratga olgan.