Hukumatning «Aholi tomorqalari va dehqon xo‘jaliklari yer maydonlaridan samarali foydalanishning qo‘shimcha chora-tadbirlari to‘g‘risida»gi qarori e’lon qilindi.
Yanvar oyida Shavkat Mirziyoyev o‘tkazgan yig‘ilishda tomorqasiga ekin ekmaganlardan yer solig‘i oshirilgan miqdorda undirilishi aytilgandi.
Hujjat bilan aholi tomorqasi va ijara asosida ajratilgan yer maydonlaridan samarali foydalanishni tashkil etish tartibi tasdiqlandi. Unga ko‘ra, tomorqa va ijara huquqi asosida ajratilgan yer maydonlarida ekin ekilishi ustidan nazorat quyidagi tartibda amalga oshiriladi.
- mahalla darajasida — «mahalla yettiligi» va «mahalla banklari»;
- tuman darajasida — tuman (shahar) shtablari hamda hokimlarining tegishliligi bo‘yicha o‘rinbosarlari boshchiligidagi ishchi guruhlar;
- hudud darajasida — Qoraqalpog‘iston Vazirlar Kengashi raisining hamda viloyatlar hokimlarining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosarlari boshchiligidagi ishchi guruhlar.
«Mahalla yettiligi» xulosasiga asosan aholi tomorqalari va ijaraga olingan yer maydonlariga ekin ekmagan yoki samarasiz foydalanayotgan shaxslarga nisbatan quyidagi ta’sirchan choralar ko‘riladi:
- tomorqa yer egalari va dehqon xo‘jaliklariga davlat dasturlari doirasida imtiyozli kreditlar berilmaydi;
- Ijtimoiy himoya yagona reyestriga kiritilgan fuqarolar uchun nazarda tutilgan imtiyozlar to‘xtatiladi;
- Online mahalla platformasi ma’lumotlari asosida ekin ekilmagani aniqlangan yil uchun yer solig‘i stavkasi uch karra miqdorida hisoblanadi.
Ijara yer maydonlarida dehqon xo‘jaligi tomonidan ekish ishlari amalga oshirilmaganda (fors-major holatlari bundan mustasno) tuman (shahar) shtablari tomonidan yer maydonlarini ikkilamchi ijaraga berish choralari ko‘riladi.
Bunda tijorat banklari, tuman (shahar) kambag‘allikni qisqartirish va bandlik bo‘limlari tomonidan kamida 40 gektar yer uchastkasida «bir kontur — bir mahsulot» tamoyili asosida yuqori daromadli va eksportbop qishloq xo‘jaligi mahsulotini yetishtirish bo‘yicha namunaviy loyihalar amalga oshiriladi.
Shuningdek, qolgan konturlardagi ijaraga olingan yer uchastkalarida mahsulot yetishtirishni tashkil etish uchun ishchi guruhlarga yetakchi tadbirkorlarni jalb qilgan holda loyihalar amalga oshirilishida ko‘maklashiladi.
