Bugun, 1 aprel kuni Andijon viloyati Izboskan tumanida joylashgan “Ahmadali hoji” jome masjididagi gaz portlashida halok bo‘lganlar oilasiga moddiy yordam berildi. Bu haqda O‘zbekiston musulmonlari idorasi xabar qildi.
O‘zbekiston musulmonlari idorasi raisi, muftiy Shayx Nuriddin Xoliqnazar masjidni mutasaddilar ishtirokida ko‘zdan kechirgan. Voqea tufayli ta’ziyali bo‘lgan xonadonlarga hamdardlik bildirgan. Qur’oni karim oyatlari o‘qilib, marhumlar haqiga bag‘ishlangan
Ma’lum qilinishicha, muftiy boshchiligidagi ulamolar vafot etganlarning janoza namozlarida, ma’raka-marosimlarida haqlariga duolar qilgan. Marhumlarning yaqinlariga moddiy-ma’naviy tasalli berilgan.
“Tan jarohati olib, shifoxonalarda muolaja olayotganlarga tez fursatda sog‘ayib ketishlarini tilandi” deyiladi xabarda.
Qayd etilishicha, halok bo‘lganlarning oila a’zolariga O‘zbekiston musulmonlari idorasi tomonidan moddiy yordamlar berilgan. Shu bilan birga, amaldagi qonunchilikka asosan moddiy yordam pullari ham to‘lash nazarda tutilgan.
“Masjidning talafot ko‘rgan qismini qayta tiklash ishlari uchun ham belgilangan tartibda mablag‘lar ajratiladi”, deyiladi xabarda.
Eslatib o‘tamiz, kecha, 31 mart kuni soat 12:19 da “Mirzo Ulug‘bek” MFY hududida joylashgan “Ahmadali hoji” jome masjidida havo-gaz aralashmasining chaqnashi sodir bo‘lgani haqida Andijon viloyati FVBga xabar kelib tushgandi. Zudlik bilan aytilgan manzilga 2 ta qutqaruv otryadi va 2 ta yong‘in-qutqaruv ekipaji yetib borgan. hodisa sodir bo‘lgani xabar qilinganida vodiyda bo‘lib turgan Bosh vazir o‘rinbosari Ochilboy Ramatov hamda Favqulodda vaziyatlar vaziri general-mayor Botir Qudratxo‘jayev Izboskan tumaniga yetib borgandi. Keyinroq O‘zbekiston musulmonlari idorasi raisi, muftiy Shayx Nuriddin Xoliqnazar ham voqea joyiga jo‘nab ketdi. Baxtsiz hodisa ortidan Vazirlar Mahkamasining tegishli farmoyishi bilan Bosh vazir o‘rinbosari Ochilboy Ramatov boshchiligida hukumat komissiyasi tuziladi. Qolaversa, ushbu gaz portlashi ortidan jinoyat ishi ham qo‘zg‘atildi. Portlashda bino ichida bo‘lgan 10 nafar shaxs turli darajada tan jarohati olgan va 3 nafar shaxs voqea joyida vafot etgan. Mazkur holat yuzasidan Andijon viloyat prokuraturasi tomonidan O‘zbekiston Respublikasi Jinoyat kodeksining 205-(Hokimiyat yoki mansab vakolatini suiiste’mol qilish) va 259- (Yong‘in xavfsizligi qoidalarini buzish) moddalari bilan jinoyat ishi qo‘zg‘atildi.
