2026 yilgi futbol bo‘yicha Jahon chempionatining ochilish uchrashuvi mundiallar tarixidagi noyob statistik natija bilan yodda qoldi. Meksika va Janubiy Afrika terma jamoalari o‘rtasidagi bahsda hakamlar uch nafar futbolchini maydondan chetlatdi.
Kecha, 11 iyun kuni Mexiko shahridagi “Azteka” stadionida bo‘lib o‘tgan bahsda mezbonlar Janubiy Afrika terma jamoasini 2:0 hisobida mag‘lub etdi.
Uchrashuvning 49-daqiqasida braziliyalik hakam Uilton Sampayo Janubiy Afrika yarim himoyachisi Sfivelo Sitoleni to‘g‘ridan to‘g‘ri qizil kartochka bilan maydondan chetlatdi. Keyinchalik uning jamoadoshi Temba Zvane ham qizil kartochka oldi.
Bahsning 90+2-daqiqasida esa Meksika terma jamoasi sardori Sesar Montes ham maydonni muddatidan oldin tark etishga majbur bo‘ldi.
Shu tariqa Jahon chempionatlari tarixida ochilish uchrashuvida ilk bor bir o‘yinning o‘zida uchta qizil kartochka qayd etildi.
Bundan avvalgi rekord 1990 yil Italiya mezbonlik qilgan mundialda o‘rnatilgan edi. Argentina va Kamerun terma jamoalari o‘rtasidagi ochilish bahsida ikki nafar futbolchi maydondan chetlatilgan. O‘shanda kamerunlik Andre Kana-Biyik qizil kartochka olgan bo‘lsa, Benjamin Massing ikkinchi sariq kartochkadan keyin o‘yinni tark etgan.
Qizil kartochkalar soni bo‘yicha Jahon chempionatlari rekordi esa 2006 yilgi mundialga tegishli. Germaniyada o‘tgan musobaqaning Portugaliya va Niderlandiya o‘rtasidagi 1/8 final bahsida rossiyalik hakam Valentin Ivanov to‘rt nafar futbolchini maydondan chetlatgan.
