Бугун, 1 апрель куни Андижон вилояти Избоскан туманида жойлашган “Аҳмадали ҳожи” жоме масжидидаги газ портлашида ҳалок бўлганлар оиласига моддий ёрдам берилди. Бу ҳақда Ўзбекистон мусулмонлари идораси хабар қилди.
Ўзбекистон мусулмонлари идораси раиси, муфтий Шайх Нуриддин Холиқназар масжидни мутасаддилар иштирокида кўздан кечирган. Воқеа туфайли таъзияли бўлган хонадонларга ҳамдардлик билдирган. Қуръони карим оятлари ўқилиб, марҳумлар ҳақига бағишланган
Маълум қилинишича, муфтий бошчилигидаги уламолар вафот этганларнинг жаноза намозларида, маърака-маросимларида ҳақларига дуолар қилган. Марҳумларнинг яқинларига моддий-маънавий тасалли берилган.
“Тан жароҳати олиб, шифохоналарда муолажа олаётганларга тез фурсатда соғайиб кетишларини тиланди” дейилади хабарда.
Қайд этилишича, ҳалок бўлганларнинг оила аъзоларига Ўзбекистон мусулмонлари идораси томонидан моддий ёрдамлар берилган. Шу билан бирга, амалдаги қонунчиликка асосан моддий ёрдам пуллари ҳам тўлаш назарда тутилган.
“Масжиднинг талафот кўрган қисмини қайта тиклаш ишлари учун ҳам белгиланган тартибда маблағлар ажратилади”, дейилади хабарда.
Эслатиб ўтамиз, кеча, 31 март куни соат 12:19 да “Мирзо Улуғбек” МФЙ ҳудудида жойлашган “Аҳмадали ҳожи” жоме масжидида ҳаво-газ аралашмасининг чақнаши содир бўлгани ҳақида Андижон вилояти ФВБга хабар келиб тушганди. Зудлик билан айтилган манзилга 2 та қутқарув отряди ва 2 та ёнғин-қутқарув экипажи етиб борган. ҳодиса содир бўлгани хабар қилинганида водийда бўлиб турган Бош вазир ўринбосари Очилбой Раматов ҳамда Фавқулодда вазиятлар вазири генерал-майор Ботир Қудратхўжаев Избоскан туманига етиб борганди. Кейинроқ Ўзбекистон мусулмонлари идораси раиси, муфтий Шайх Нуриддин Холиқназар ҳам воқеа жойига жўнаб кетди. Бахтсиз ҳодиса ортидан Вазирлар Маҳкамасининг тегишли фармойиши билан Бош вазир ўринбосари Очилбой Раматов бошчилигида ҳукумат комиссияси тузилади. Қолаверса, ушбу газ портлаши ортидан жиноят иши ҳам қўзғатилди. Портлашда бино ичида бўлган 10 нафар шахс турли даражада тан жароҳати олган ва 3 нафар шахс воқеа жойида вафот этган. Мазкур ҳолат юзасидан Андижон вилоят прокуратураси томонидан Ўзбекистон Республикаси Жиноят кодексининг 205-(Ҳокимият ёки мансаб ваколатини суиистеъмол қилиш) ва 259- (Ёнғин хавфсизлиги қоидаларини бузиш) моддалари билан жиноят иши қўзғатилди.
