Bular — ko‘plab patologiyalar qatori allergik kasalliklarni ham keltirib chiqaruvchi asosiy omillar. Shu bois dunyo bo‘yicha ushbu turdagi xastaliklarni aniqlash, davolash va ularning oldini olish dolzarb masalaga aylanmoqda, deya xabar bermoqda SSV Matbuot xizmati.
Respublika ixtisoslashtirilgan allergologiya va klinik immunologiya ilmiy-amaliy tibbiyot markazi yurtimizda mazkur yo‘nalishda aholiga malakali tibbiy xizmat ko‘rsatuvchi bosh muassasa hisoblanadi.
— 200 ga yaqin tekshiruv usullarini qo‘llayapmiz, — deydi markaz direktori Ilmira Razikova. — Masalan, birgina “ALEX” tashxis usuli bemor qonidagi salkam 300 ta allergenga sezuvchanlikni molekular oqsil darajasida aniqlash imkonini beradi.
“PROTIA Allerqy-Q 96” texnologiyasi orqali esa 90 turdagi maxsus allergenlarni bir vaqtning o‘zida tekshirish mumkin. Qolaversa, eng ilg‘or diagnostika usuli bo‘lgan “Phadia 200” yordamida 100 ga yaqin mahsulotlarga nisbatan oqsil darajasida allergik holatlarni aniqlay olamiz.
Umuman, shu yil boshidan buyon markazimizda 5 ta yangi tashxis va 5 ta davolash usuli joriy etildi. Jumladan, yashirin bronxlar giperreaktivligini aniqlashda bronxoprovakatsion diagnostika turidan foydalana boshladik. Immunoglobulin Ye ni IXLA usulida tekshirish o‘zlashtirildi.
Markazimizda yangi LOR-kombayn moslamasi ishga tushirildi. Shu tariqa yuqori nafas a’zolarini tekshirish imkoniyati yuzaga keldi.
Dori allergiyasi natijasida rivojlangan toksikodermiyani hamda surunkali idiopatik qavarchiqlarni plazmoferez yordamida, gistaminozlarni “DAO Prim Vegan” preparati bilan davolash texnologiyasi, bahorgi o‘simliklar changchalari aralashmasi bilan maxsus allergologik immunoterapiya amaliyotga tatbiq etildi.
Shu bilan birga, yaqinda maslahat poliklinikamizga Angliyada ishlab chiqilgan BTL-08 SPIRO PRO spirografini o‘rnatdik. Bu texnologiya orqali tashqi nafas yo‘llariga baho berilib, sinamalar o‘tkaziladi.
Hozir muassasamizda rivojlangan mamlakatlar klinikalarida qo‘llanilayotgan eng zamonaviy innovatsion allergochip ImmunoCAP ISAC tekshiruv usulini yo‘lga qo‘yish harakatidamiz. Bu diagnostika vositasi bir paytning o‘zida 112 xil allergenning oqsilli molekulasini aniqlash imkonini beradi.
Bunday izlanish va yangilanishlar natijasida markazimizga xorijiy mamlakatlardan ham bemorlar murojaatlari soni orta boshladi. Misol uchun, o‘tgan uch oyda bu yerda Rossiya, Hindiston, Qozog‘iston, Qirg‘iziston, Tojikiston, Turkaniston, Afg‘oniston kabi o‘nga yaqin davlatdan tashrif buyurgan fuqarolarning qariyb 170 nafari ambulator, 20 nafarga yaqini statsionar sharoitda davolandi.
Bu kabi ijobiy o‘zgarishlar markazning joylardagi hududiy filiallari faoliyatida ham kuzatilmoqda.
