Булар — кўплаб патологиялар қатори аллергик касалликларни ҳам келтириб чиқарувчи асосий омиллар. Шу боис дунё бўйича ушбу турдаги хасталикларни аниқлаш, даволаш ва уларнинг олдини олиш долзарб масалага айланмоқда, дея хабар бермоқда ССВ Матбуот хизмати.
Республика ихтисослаштирилган аллергология ва клиник иммунология илмий-амалий тиббиёт маркази юртимизда мазкур йўналишда аҳолига малакали тиббий хизмат кўрсатувчи бош муассаса ҳисобланади.
— 200 га яқин текширув усулларини қўллаяпмиз, — дейди марказ директори Илмира Разикова. — Масалан, биргина “ALEX” ташхис усули бемор қонидаги салкам 300 та аллергенга сезувчанликни молекуляр оқсил даражасида аниқлаш имконини беради.
“PROTIA Allerqy-Q 96” технологияси орқали эса 90 турдаги махсус аллергенларни бир вақтнинг ўзида текшириш мумкин. Қолаверса, энг илғор диагностика усули бўлган “Phadia 200” ёрдамида 100 га яқин маҳсулотларга нисбатан оқсил даражасида аллергик ҳолатларни аниқлай оламиз.
Умуман, шу йил бошидан буён марказимизда 5 та янги ташхис ва 5 та даволаш усули жорий этилди. Жумладан, яширин бронхлар гиперреактивлигини аниқлашда бронхопровакацион диагностика туридан фойдалана бошладик. Иммуноглобулин Е ни ИХЛА усулида текшириш ўзлаштирилди.
Марказимизда янги ЛОР-комбайн мосламаси ишга туширилди. Шу тариқа юқори нафас аъзоларини текшириш имконияти юзага келди.
Дори аллергияси натижасида ривожланган токсикодермияни ҳамда сурункали идиопатик қаварчиқларни плазмоферез ёрдамида, гистаминозларни “DAO Prim Vegan” препарати билан даволаш технологияси, баҳорги ўсимликлар чангчалари аралашмаси билан махсус аллергологик иммунотерапия амалиётга татбиқ этилди.
Шу билан бирга, яқинда маслаҳат поликлиникамизга Англияда ишлаб чиқилган BTL-08 SPIRO PRO спирографини ўрнатдик. Бу технология орқали ташқи нафас йўлларига баҳо берилиб, синамалар ўтказилади.
Ҳозир муассасамизда ривожланган мамлакатлар клиникаларида қўлланилаётган энг замонавий инновацион аллергочип ImmunoCAP ISAC текширув усулини йўлга қўйиш ҳаракатидамиз. Бу диагностика воситаси бир пайтнинг ўзида 112 хил аллергеннинг оқсилли молекуласини аниқлаш имконини беради.
Бундай изланиш ва янгиланишлар натижасида марказимизга хорижий мамлакатлардан ҳам беморлар мурожаатлари сони орта бошлади. Мисол учун, ўтган уч ойда бу ерда Россия, Ҳиндистон, Қозоғистон, Қирғизистон, Тожикистон, Турканистон, Афғонистон каби ўнга яқин давлатдан ташриф буюрган фуқароларнинг қарийб 170 нафари амбулатор, 20 нафарга яқини стационар шароитда даволанди.
Бу каби ижобий ўзгаришлар марказнинг жойлардаги ҳудудий филиаллари фаолиятида ҳам кузатилмоқда.
