Toshkentning Mirobod tumanida ikki nafar shaxs uyida issiqxona sharoitida giyohvand o‘simligi yetishtirgani aniqlandi. Bu haqda poytaxt IIB Matbuot xizmati xabar qildi.
Qayd etilishicha, ular taqiqlangan o‘simlikni issiqxona uslubida, tuvakda, maxsus yorug‘lik va havo almashinuvi vositalari yordamida yetishtirgan. O‘simliklar 12 tupni tashkil qilgan, ularning uzunligi 60 sm-170 sm bo‘lgan.
Xonadonda shuningdek, giyohvand o‘simliklarining quritilgani, iste’mol uchun tayyorlab qo‘yilganlari ham topilgan. Barcha giyovdand o‘simlik va moddalar daliliy ashyo sifatida olingan.
Bundan tashqari, ushbu hududda yana bir holat aniqlandi. Xonadon xolislar ishtirokida ko‘zdan kechirilganda uy egasi giyohvandlik vositalari yetishtirilayotganligi aniqlangan. IIO xodimlarini ko‘rgan shaxs daliliy ashyolarni suvga oqizib yubormoqchi bo‘lgan. Ammo bu ish bermagan.
Xolislar ishtirokida ushbu giyohvandlik vositalari ham rasmiylashtirib olinib, ekspertizaga topshirildi.
Hozirda ularga nisbatan 10 yildan 20 yilgacha ozodlikdan mahrum etish jazosi belgilanishi mumkin.
