Sud tomonidan uyushgan jinoyatchilikda ayblangan H.Sh. ismli shaxs 8 yilga ozodlikdan mahrum etildi. U “Baxti Tashkentskiy” nomi bilan tanilgan jinoyat olami vakili Baxtiyor Qudratillayevning o‘g‘li Bekzod Zafarov bilan yaqin aloqada bo‘lgani ma’lum qilindi.
H.Sh. Baxtiyor Qudratillayev tomonidan Samarqand viloyatiga “polojenets” sifatida tayinlangan shaxs boshchiligidagi jinoiy guruhga qo‘shilgan. Guruh a’zolari “ko‘chani qo‘lga olib”, aholiga nisbatan turli bosim va zo‘ravonliklar uyushtirib kelgan.
Jinoyat tafsilotlariga ko‘ra, ular Qozog‘iston fuqarosi bo‘lgan shaxsdan 10 ming dollar qarz borligini eshitib, Samarqandlik M.B.ni tahdid ostiga olib, undan pullarni “ko‘cha yechimi” orqali undirishga harakat qilgan. Guruh a’zolari M.B.ni fermer xo‘jaligida ushlab, so‘ng uni oshxonaga olib borib, ruhiy va jismoniy bosim o‘tkazgan. Hatto, boshiga “bokal” bilan urib, tan jarohati yetkazishgacha borgan.
Sud materiallarida aytilishicha, jabrlanuvchidan dastlab 500 dollar, keyin 1 200 dollar undirishgan. Umumiy hisobda yetkazilgan moddiy zarar 19 million so‘mdan oshgan.
H.Sh. sudda o‘z aybini tan olmadi. U Bekzod Zafarov bilan faqat tanish bo‘lganini, jinoyatga aloqasi yo‘qligini bildirdi. Unga ko‘ra, Bekzod uni domla oldiga olib borishni so‘ragan va o‘sha kuni Samarqandda Sanya ismli shaxs bilan ilk bora tanishgan.
Biroq sud H.Sh.ning aybini isbotlangan deb topdi va unga Jinoyat kodeksining 165-moddasi 3-qismi “v” bandi bo‘yicha 8 yil ozodlikdan mahrum qilish jazosi tayinladi.
Eslatib o‘tamiz, Baxtiyor Qudratillayev, ya’ni “Baxti Tashkentskiy” “qonundagi o‘g‘ri” sifatida jinoyat olamida tanilgan shaxslardan biri hisoblanadi.
