Суд томонидан уюшган жиноятчиликда айбланган Ҳ.Ш. исмли шахс 8 йилга озодликдан маҳрум этилди. У “Бахти Ташкентский” номи билан танилган жиноят олами вакили Бахтиёр Қудратиллаевнинг ўғли Бекзод Зафаров билан яқин алоқада бўлгани маълум қилинди.
Ҳ.Ш. Бахтиёр Қудратиллаев томонидан Самарқанд вилоятига “положенетс” сифатида тайинланган шахс бошчилигидаги жиноий гуруҳга қўшилган. Гуруҳ аъзолари “кўчани қўлга олиб”, аҳолига нисбатан турли босим ва зўравонликлар уюштириб келган.
Жиноят тафсилотларига кўра, улар Қозоғистон фуқароси бўлган шахсдан 10 минг доллар қарз борлигини эшитиб, Самарқандлик М.Б.ни таҳдид остига олиб, ундан пулларни “кўча ечими” орқали ундиришга ҳаракат қилган. Гуруҳ аъзолари М.Б.ни фермер хўжалигида ушлаб, сўнг уни ошхонага олиб бориб, руҳий ва жисмоний босим ўтказган. Ҳатто, бошига “бокал” билан уриб, тан жароҳати етказишгача борган.
Суд материалларида айтилишича, жабрланувчидан дастлаб 500 доллар, кейин 1 200 доллар ундиришган. Умумий ҳисобда етказилган моддий зарар 19 миллион сўмдан ошган.
Ҳ.Ш. судда ўз айбини тан олмади. У Бекзод Зафаров билан фақат таниш бўлганини, жиноятга алоқаси йўқлигини билдирди. Унга кўра, Бекзод уни домла олдига олиб боришни сўраган ва ўша куни Самарқандда Саня исмли шахс билан илк бора танишган.
Бироқ суд Ҳ.Ш.нинг айбини исботланган деб топди ва унга Жиноят кодексининг 165-моддаси 3-қисми “в” банди бўйича 8 йил озодликдан маҳрум қилиш жазоси тайинлади.
Эслатиб ўтамиз, Бахтиёр Қудратиллаев, яъни “Бахти Ташкентский” “қонундаги ўғри” сифатида жиноят оламида танилган шахслардан бири ҳисобланади.
