Qo‘shni davlat rasmiylari davlat tilining mavqeini mustahkamlashga jiddiy kirishishga qaror qildi. Qirg‘iziston parlamenti qirg‘iz tilini bilish amaldorlar, sudyalar, xavfsizlik kuchlari va hatto muhojirlar uchun majburiy bo‘lgan qonun loyihalarini ma’qulladi, deb yozmoqda Orda.kz.
24.kg nashrining yozishicha, Jogorku Kenesh mahalliy parlamenti qirg‘iz tilining qo‘llanilishiga oid tuzatishlar paketini ikkinchi va uchinchi o‘qishda qabul qilgan. Endi davlat tilini bilish bir qator kasb va lavozimlar uchun majburiy shartga aylanadi. Deputatlar, vazirlar, barcha darajadagi sudyalar, prokurorlar, tergovchilar, Milliy bank xodimlari, xavfsizlik kuchlari va milliy xavfsizlik organlari xodimlaridan qirg‘iz tilini bilish talab etiladi. Tegishli til darajasiga ega bo‘lmagan advokatlar va notariuslarga litsenziya berilmaydi.
Bundan tashqari, agar chet ellik qirg‘iz tilini bilmasa, unga yashash guvohnomasi yoki immigrant maqomi berilishi rad etilishi mumkin.
O‘zgarishlar OAVga ham ta’sir ko‘rsatdi - qirg‘iz tilidagi eshittirishlar umumiy teleradiokontent hajmining kamida 60 foizini tashkil etishi kerak. Bundan tashqari, davlat tilidagi reklama matnlari endi imlo va til me’yorlariga muvofiqligi bo‘yicha mahalliy hokimiyat organlari bilan kelishilishi kerak.
Nazorat va jazolash mas’uliyati Davlat tili va til siyosati bo‘yicha milliy komissiya zimmasiga yuklatilgan. Qabul qilingan normalar, tashabbus mualliflarining so‘zlariga ko‘ra, qirg‘iz tilining mavqeini mustahkamlashga, davlat va jamiyat sohalarida undan keng foydalanishga qaratilgan.
