Joriy yilning 22 iyulidan boshlab YouTube mustaqil ravishda jonli efir olib borish uchun minimal yosh chegarasini 16 yoshga ko‘tarmoqda.
13–15 yoshli o‘smirlar strim qilishni faqat katta yoshli shaxs hamrohligida amalga oshirishlari mumkin. Aks holda, ular chat va boshqa funksiyalarga kirish imkonidan mahrum bo‘lishi mumkin.
YouTube joriy yil 22 iyuldan boshlab xavfsizlik siyosatida jiddiy o‘zgarishlar kiritayotganini e’lon qildi: 16 yoshgacha bo‘lgan foydalanuvchilar katta yoshli shaxs kadrda ko‘rinib turmasa va kanalda menejer, tahrirchi yoki egasi sifatida ro‘yxatdan o‘tmagan bo‘lsa, mustaqil ravishda jonli efir o‘tkaza olmaydi.
Agar qoida buzilsa:
- chat yopiladi;
- efir funksiyalari cheklanadi;
- jonli efir o‘chirilishi mumkin.
Qoidalarni chetlab o‘tish (masalan, boshqa kanal orqali efir uyushtirish) taqiqni buzish deb hisoblanadi va akkauntning yopilishiga olib kelishi mumkin.
YouTube o‘zgarishlar sababini rasman oshkor etmagan bo‘lsa-da, bu qadam kattalar hamrohligisiz jonli efirlardagi xavflar — shaxsiy ma’lumotlarning tarqalishi, chatda noxush muloqotlar va boshqa xatarlardan o‘smirlarni himoya qilishga qaratilgani aytiladi.
YouTube ta’kidlaganidek, strim — “oldindan bashorat qilib bo‘lmaydigan format” hisoblanadi va u alohida nazoratni talab qiladi.
Platforma fikriga ko‘ra, bu o‘zgarishlar yangi blogerlar uchun qiyinchilik tug‘dirishi mumkin, ammo bolalar xavfsizligi har qanday natijadan ustundir.
