Ma’lum qilinishicha, bu konsertlar, festivallar, spektakllar, ko‘rgazmalar va boshqa tadbirlarga taalluqli. Qaror “Rossiya huquq-tartibot idoralari tomonidan etnik kelib chiqishi bo‘yicha Yekaterinburgda ozarbayjonliklarga nisbatan namoyishkorona, maqsadli va suddan tashqari qotilliklar hamda zo‘ravonlik harakatlari sodir etilgani munosabati bilan” qabul qilingan.
So‘nggi paytlarda bu kabi holatlar tizimli tus olmoqda, deyiladi xabarda.
27 iyun kuni Yekaterinburgda 50 dan ortiq ozarbayjonlik qo‘lga olindi. Mahalliy OAVning yozishicha, hibsga olishlar 2001-yilda ozarbayjonlik Yunus Pashayevning o‘ldirilishi bo‘yicha ochilmagan jinoiy ish, shuningdek, 2010—2011 yillarda sodir etilgan yana ikkita jinoyat bilan bog‘liq.
Ushbu ish bo‘yicha asosiy gumondorlar bo‘lgan aka-uka Guseyn va Ziyoddin Safarovlar hibsga olinayotgan paytda vafot etgan. E1.ru nashri manbasiga ko‘ra, ulardan birining yuragida muammolar kuzatilgan va vafot etgan. Ikkinchisida ham, “xuddi shunday vaziyat” kuzatilgani aytilmoqda.
Ozarbayjon Tashqi ishlar vazirligi 27 iyun kuni Rossiya xavfsizlik kuchlari tomonidan o‘tkazilgan reydlar munosabati bilan Rossiyaning mamlakatdagi elchixonasi muvaqqat ishlar vakili Pyotr Volokovichni chaqirtirgan.
Rossiya Tashqi ishlar vazirligi rasmiy vakili Mariya Zaxarovaga ko‘ra, Volokovich “Ozarbayjon tomoniga zarur tushuntirishlar bergan” va “vaziyat huquq-tartibot idoralari nazorati ostida ekaniga ishontirgan”. 29 iyun kuni Yekaterinburgning Lenin tuman sudi qotillik ishi bo‘yicha gumon qilingan uch kishini tergov izolatoriga yuborgan. Sud yana uch nafar mahbusga nisbatan ehtiyot chorasini tanlashi kutilmoqda.
