Joriy yilning oxirida Rossiyada yangi kupyuralar muomalaga chiqariladi. Bu haqda RF Markaziy bank matbuot xizmati xabar qildi. Yangi kupyuralar 200 va 2000 nominaliga ega bo`ladi.
“200 rubllik banknotada Sevastopol aks etadi. 2000 rubllik qog`oz pulda Uzoq Sharqning mashhur joylari — Vladivostok ko`prigi va Amur viloyatidagi Sharqiy kosmodrom surati bo`ladi”, — deyiladi xabarda.
Banknotalar dizayni bo`yicha yakuniy qaror Butunrossiya tanlovi natijasida qabul qilingan. Tanlov o`tgan yilning iyun-oktyabr oylarida bo`lib o`tgan edi. Unda 5 mingdan ortiq da`vogarlar qatnashgan. 3 milliondan ortiq kishi ishtirok etgan ovoz berish jarayonida Uzoq Sharq va Sevastopol timsollari tanlandi.
Markaziy bank raisi Elvira Nabiullinaning fikricha, yangi pullar fuqarolarning mahsulotlar va xizmatlar uchun haq to`lashini engillashtiradi.
Rossiya banki, so`nggi marotaba, 2009 yilda 10 rubllik tangalarni muomalaga chiqargandi.
