​«Dovuchcha egim kelayapti…» Nima egingiz kelayotganining farzand jinsiga ta`siri bormi?

Men

Homiladorlik davrida falon narsani eging kelsa o`g`il, pismadon narsaga boshqorong`i bo`lsang, qiz ko`rasan, degan gaplarni ko`p eshitganman. Shaxsiy tajribamdan kelib chiqadigan bo`lsam, bu gaplarda jon bordek. Masalan, o`g`limga homiladorlik paytimda nuqul go`sht egim kelardi. Toksikoz ham juda engil o`tgan, rangim tiniqlashib, chehram ochilib, bir husnimga o`n husn qo`shilgandi. Buni o`sha paytlar tushgan fotosuratlarim ham tasdiqlab turibdi. Qizimda esa aksincha, toksikoz og`ir kechdi, uch oy hatto suv ham icholmay, nuqul tomchi dorilar bilan kun ko`rdim. Ozib-to`zib, rangim qorayib, sochlarim to`kilib, tirnoqlarim sinib, juda xunuklashib ketgandim. Meni ko`rganlar qiz (qiz bo`lgandayam, sohibjamol) tug`asan, deyishardi. Toksikoz o`tib, ul-bul eya boshlaganimda esa nuqul shirinlik, mevalar, barra bodring va pomidorli salatlarga ko`nglim sust ketdi. Taxmin qilinganidek, chiroylikkina qiz ko`rdim. Ammo bu birgina holat olamshumul nazariyaning isboti uchun kamlik qiladi. Shunga ko`ra, atrofimdagi tanish ayollardan, opa-singillar, dugonalardan homiladorlik davrida nima egilari kelganiyu, buning bo`lajak bola jinsidan naqadar to`g`ri darak bergani haqida surishtirdim.

Nafisa, ikki o`g`ilning onasi, uchinchisiga homilador

Birinchi homiladorligimda nuqul go`sht egim kelardi, o`g`il ko`rasan deyishdi, rostdan ham o`g`il tug`dim. Ikkinchisida esa yangi uzilgan qulupnayga boshqorong`i bo`ldim. Qishning chillasi edi, hech qaerdan topib bo`lmadi. Qulupnayli murabbo, sharbat, yogurt, hatto sovun, qog`oz sochiqchalar va yuvinish vositalari ham xumorimni bosolmadi. Oxiri allaqaerdan muzlatilganini topib kelib berishdi, shu bilan biroz tinchlandim. Qiz bo`ladi deb o`yladik. Qayoqda! Yana o`g`il. Ammo o`g`illarimning ikkisi ikki xil tabiatli. To`ng`ichim o`t-olov, erga ursangiz, ko`kka sapchiydi. Kichigim esa yuvoshgina. Uchinchi safar qiz bo`lishidan umidimiz katta edi. Nuqul muzqaymoq va tortlar egim kelayapti. Lekin o`tgan hafta ultratovush tekshiruvidan o`tsam, yana o`g`il dedi. Shirinlikka boshqorong`i bo`lsa, qiz tug`iladi degan gap to`g`ri yo noto`g`riligini bolam tug`ilgach aytaman.

Olima, ikki farzandning onasi

O`g`limga homiladorligimda faqat «kola» ichgim kelardi. Zararli deyishsa ham bir kun ichmasam, o`lib qoladigandek edim. Qizimda esa tarvuz, olma va qurutsiz kunim o`tmaydigan bo`lib qoldi. Chindan ham, nimaga boshqorong`i bo`lganingga qarab kim tug`ilishini aniqlasa bo`ladi, shekilli.

Fazilat, to`rt qizning onasi

Aytishlaricha, homilador bo`lish arafasida er-xotin qattiq ruhiy zarba olsa, kim bilandir urishib, asabiylashsa, qiz tug`ilarkan. Buni olimlar aniqlashibdi. Ammo men qizlarimni yaxshi niyat bilan Xudodan tilab olganman. Chunki turmushimizning ilk etti yilida befarzand edik. To`rt qizimda to`rt xil narsaga boshqorong`i bo`lganman. To`ng`ichimda dovuchcha, ikkinchimda qovurilgan tovuq, uchinchimda handalak, to`rtinchimda esa gazlangan mineral suvga ehtiyojim baland bo`ldi.

Mastura, ikki qizning onasi, uchinchisiga homilador

Xamirli ovqatlarga o`ch bo`lsang qiz, go`shtli taomlar eging kelsa, o`g`il tug`iladi, deyishgandi. To`ng`ichimda somsaxo`r bo`lganimni shu gaplarning isbotiga yo`yib, ikkinchimda kabob egim kelsa, rosa xursand bo`lgandim. Erim ham har ikki kunning birida kabob ko`tarib kelardi. Ammo Yaratganning ishlariga aralashib bo`lmas ekan, yana qiz ko`rdik. Uchinchi homiladorligimda muzqaymoq egim kelganini avval erimga aytishga qo`rqdim. Yana qiz ekan deb xafa bo`lishini istamadim-da! Ammo yashirincha muzqaymoqxo`rlik qilib yurganimni bilib qolib, mendan xafa bo`ldi. «O`g`ilmi, qizmi, pushti kamarimdan bo`lgan farzandim, bolaning ko`nglini halitdan o`ksitma» deb, o`zi har kuni muzqaymoq olib keladi. Kecha ultratovush tekshiruvi o`g`il ko`rsatdi! Boshimiz osmonda!

Nargiza, bir o`g`ilning onasi

Homiladorligimda nimalar egim kelmadi deysiz. Birinchi uch oyda hech nima eya olmadim. Keyin dovuchchaga dilim ketdi. Erim sho`rlik yarim kechasi qo`shnining tomiga tirmashib uzib tushgan bir hovuch dovuchchadan bittaginasini eb, teskari burilganimni ko`rib, yig`lamoqdan beri bo`lgani esimda. So`ng shaftoli egim keldi, mavsum bo`lmasa-da topib kelishdi. Keyin gamburgerga o`tdim, oxirgi oyda esa faqat sho`r bodringni qo`msayman deng. Aksiga olib, oxirgi haftalarda sho`r eyish mumkin emas. Xullas, bir amallab bolamni bag`rimga bosdim. Hozir to`rt yashar bo`lgan o`g`limiz ovqatga shunaqangi injiqki, bir narsani edirish amri mahol.

Aslida biron narsaga boshqorong`i bo`lishning ilmiy izohi bor: homila o`z rivojlanishida etishmayotgan moddani u yoki bu tabiiy mahsulot ko`rinishida talab qiladi. Masalan, kaliy zarur bo`lsa, banan, kalsiy uchun qurut, oqsillar kerak bo`lsa, go`sht va h.k. Lekin ayollarga birgina ilmiy izohning o`zi kamlik qiladi. Ayniqsa, chor atrofimizda biz ishongan (yoki ishonishni istagan) irimlar kunda-kunora o`z hayotiy tasdig`ini topib turganda. Demak, homiladorlikda nima eyishimiz tug`ilajak farzand jinsi bilan bog`liqligi haqidagi gaplarda jon bor. Chunki biz bunga IShONAMIZ!

Shahina tayyorladi