Xitoylik er-xotin “Ichiga yovuz ruhlar kirib olgan” deb hisoblagan o`g`lini 30 yil mobaynida tutqinlikda saqladi, deb xabar berdi Vesti.ru nashri.
Ismi oshkor etilmagan 39 yoshli erkak bolaligidan beri Xitoyning Guansi viloyatidagi Beyxay shahridagi derazasiga panjara o`rnatilgan, eshigiga qulf solingan uyda yashab kelgan.
Ota-onasining so`zlariga qaraganda, u olti yoshligida uydan qochib ketgan, uni begona odam uyiga qaytarib olib kelgan, shundan keyin “yovuz ruhlardan tozalash” marosimi o`tkazilganiga qaramay, bola muntazam ravishda uyidan qochib ketavergan, qo`shnilarining uyiga o`g`irlikka tushgan. Shundan keyin ota-onasi uni uyning bir xonasiga qamab, eshigiga qulf osishgan.
Ayolning aytishicha, turmush o`rtog`i bilan farzandining kundalik ehtiyojlarini qondirib, barcha talab-istaklarini bajargan, ammo uni ozodlikka qo`yib yuborishmagan. Ayni paytda erkakni ruhiy kasalliklar shifoxonasiga joylashtirish chora-tadbirlari ko`rilmoqda.
