AQShning Missuri shtatidagi Sent-Luis shahar sudi Johnson & Johnson xolding kompaniyasining mahsulotidan foydalanib, saratonga chalingan ayolga kompaniya tomonidan 110 million dollar tovon puli to`lashga hukm chiqardi, deb xabar berdi Ria.ru nashri.
Virjiniya shtatida yashovchi ayol 40 yil mobaynida mazkur kompaniyaning upali talkidan foydalanib kelgan. 2012 yilda unga tuxumdonlar saratoni tashxisi qo`yilgan, yaqinda esa metastaza ta`sirida jigari ishdan chiqqan. Ayni paytda u kimyoterapiya qabul qilmoqda. Ayol saratonga chalinishiga aynan Johnson & Johnson kompaniyasining mahsuloti sabab bo`lgan, deb hisoblamoqda.
Kompaniya esa ular ishlab chiqargan mahsulotlar bezararligini isbotlashga harakat qildi. Kompaniya saratonga chalingan ayolning dardiga hamdardligini bildirib, sud hukmidan norozi bo`lgani haqida shikoyat arizasi berishi haqida ma`lum qildi.
Sud hukmiga binoan mazkur kompaniya to`lashi lozim bo`lgan 110 million dollar uning tarixidagi eng rekord darajadagi tovon pulidir. Shu paytgacha kompaniyaga nisbatan 2,4 ming marotaba shikoyat arizasi tushgan. O`tgan yilning fevral oyida sud tuxumdon saratonidan vafot etgan ayolning oilasiga 72 million dollar tovon puli to`lash haqida kompaniyaga nisbatan hukm chiqargan edi. Oradan ko`p o`tmay, yana bir saratonga chalingan ayolning shikoyatiga binoan sud Johnson & Johnson kompaniyasini 55 million dollar tovon puli to`lashga hukm qilgan edi.
