Ozg`inlikning sababi nima?
Buni qarangki, vazn etishmasli ham huddi ortiqcha vazn singari bir qancha sabablarga ega ekan. Ayollarda bu holat nasliy omil, noto`g`ri ovqatlanish, gormonal o`zgarishlar va turli kasalliklar tufayli paydo bo`ladi. Ko`pgina ayollarda ovqat hazm qilish tizimi juda faol ishlagani sababli ozuqaviy moddalar organizmga singishga ulgurmaydi. Gormonlar sababli ozib ketganlar muammoni endokrinolog bilan bartaraf etgani ma`qul. Shuningdek, ovqat hazm qilish tizimidagi xastaliklar, gastrit, oshqozon yallig`lanishi ham moddalar tanaga singmasligiga olib keladi.
Yog`mi yoki oqsil
Aksariyat ozg`in ayollarning xatosi shundaki, ular semirish ilinjida ko`p ovqat tanovul qilishga va ko`proq yotib dam olishga harakat qilishadi. Yoki to`yib ketsa ham ovqat eyaveradi. Aslida, oshqozonga haddan ortiq egulik tushganda, ovqat hazm qilish jarayoni buziladi. Bu esa o`z navbatida moddalar almashinuvini izdan chiqarib, salomatlikka salbiy ta`sir ko`rsatadi. Shu sababdan ayollarga bunday usulda vazn yig`ish tavsiya etilmaydi. Yaxshisi, oqsilga boy mahsulotlar: mol go`shti, tovuq go`shti, sut va sut mahsulotlaridan kerakli miqdorda tanovul qilish bilan mushaklar og`irligiga erishish mumkin. Ana shundagina to`g`ri vazn to`plangan bo`ladi.
Ochlik bilan semirtirish
Mashhur dietolog, bir qancha sog`lomlashtirish markazlari asoschisi Bob Shvars semirishni istagidagi ayollarni ochlik asosidagi parhezga mahkum qilib ko`rdi. Bundan ular yanada ozib ketishadi-ku, deb o`ylashga shoshmang. Ikki hafta davomida ochlikdan aziyat chekkan xonimlar keyingi ikki haftada ko`proq va kalloriyaliroq taomlarni iste`mol qila boshlashdi. Ikki oy davom etgan bunday “ajoyib” usuldan keyin o`sha ayollarni yog` bosib, “Єanday ozsam ekan” deb yana dietologga murojaat qilishdi.
Jismoniy mashqlar ozdirmaydi?
Bir turdagi mashqlardan ham ozib, ham semirib bo`lmaydi. Vazn tashlashda raqs, aerobika, sheyping yordam bersa, og`ir atletika, tosh ko`tarish kabi sport turlari bilan shug`ullanish natijasija semirish mumkin. Chunki gantellar yordamida bajarilgan mashqlar mushaklarni chiniqtirishga ko`maklashadi. Bundan tashqari o`zingiz istagan tana qismiga ko`proq “ishlov berish” imkoniyati mavjud. Ko`pgina dietologlar mashqlar bilan bir qatorda oqsilli kokteyllarni ham tavsiya etishadi. Bu bilan kutilgan natijaga tezroq erishish mumkin. Faqat kokteyl yoki mushaklarni o`stiruvchi dorilarning miqdori individual ravishda dietolog-shifokor tomonidan belgilanishi lozim.
Avval davolaning, keyin to`lishasiz!
Ayollar vazn to`plash uchun atayin mashq zaliga borib shug`ullanishsa ham o`zi istagan natijaga erisholmaydi. Urinishlari zoe ketganidan tashqari, charchoq, haddan ortiq og`riqlar tufayli xafsalasi pir bo`ladi. Dietologlar esa bunday vaziyatda terapevt shifokorga murojaat qilishni tavsiya etishadi. Chunki, aksariyat hollarda ayollardagi anemiya, hayz siklining buzilishi oqibatidagi yoki bavosir sabab qon ketishi mushaklarga kislorod etib kelishiga to`sqinlik qiladi. Bu esa o`z navbatida mushaklarning rivojlanishini sekinlashtiradi. Shu sababdan ular avval davolanib, so`ng mashq bajarishga kirishganlari maqsadga muvofiq.
Kamola tayyorladi.
Manba: "SUG‘DIYONA" gazetasi
