Bu o`yin-testda xayolingizga birinchi kelgan narsani eslab qolishingiz muhim. Shu obrazni xayolda ushlab turing va ikir-chikirlarigacha ko`rib olishga harakat qiling. Har ehtimolga qarshi javoblarni yozib borish uchun ruchka va qog`oz tayyorlab qo`ying.
Ogohlantiramiz: bu test ilmiy-psixologik tadqiqot emas, uni jiddiy qabul qilmang. Ammo natijalardan ayrim xulosalar chiqarsangiz bo`ladi.
Tasavvur qiling…
…keng sahro, tasavvuringiz etganicha keng. Shu sahroda bir kub turibdi…
- Kubni tasvirlab bering. U qanchalik katta? Qaerda turibdi: qum ustidami yoki tagiga ko`mib yuborilganmi? Balki muallaq turgandir. Harakatlanayaptimi? Yarimtami yoki butunmi? Javobim to`g`ri yoki noto`g`ri deb o`ylab o`tirmang, muhimi, siz kubni qanday tasavvur qilayotganingizda.
- Demak, siz sahrodasiz, kubni ko`rib turibsiz, shuningdek, o`sha erda zina ham borligini bilib qoldingiz. Uni xayolingizda gavdalantiring. Nimadan qurilgan? Qanchalik uzun? Eskimi yo yangi? Kubga nisbatan qaerda joylashgan? Kubdan balandmi yo pastmi?
- Endi sahrodagi otni ko`z oldingizga keltiring. Uni tasvirlab bering. Eng muhimi: ot sizdan qanchalik uzoqda, u nima qilayapti? Qaysi yo`nalish bo`ylab harakatlanayapti? Ko`rinishi qanday?
- Sahrodagi gullarni xayol qiling. Ular qanchalik ko`p? Qaerda o`sayapti? Qanday ko`rinishga ega? Ot, kub, zina va qumga nisbatan qaerda o`sayapti?
- Momaqaldiroq boshlandi. Uning batafsil tasvirini qog`ozga yozib qo`ying. Shamol kuchlimi? Momaqaldiroq sizga yaqin joyda bo`layaptimi yoki uzoqda? U ot, gullar, kub va zinaga qandaydir ta`sir ko`rsatayaptimi?
Navbat tahlilga
Endi bu tasavvurlaringizni tahlil qilasiz. Bu juda oson.
Kub, bu — sizning o`zligingiz.
- Katta kub sizning o`ziga ancha ishongan va rahbarlikni qoyillatadigan inson ekaningizni anglatadi. Agar kubingiz kichik bo`lsa, demak, siz uyatchan va kamtar odamsiz. To`y-hashamlarda e`tibor markazida turishni yoqtirmaysiz.
- Agar kubni qumga ko`milib yotgan holda tasavvur etgan bo`lsangiz, har qadamini to`g`ri hisoblab bosadigan tadbirkorsiz. Qum ustida turgan kub sizning hayotdan nima istashini biladigan aqlli inson ekaningizni ko`rsatadi. Agar kub qimirlab joyini o`zgartirayotgan yoki aylanayotgan bo`lsa, boshqalarga o`xshamaydigan, alohida fikrlaydigan inson ekaningizdan dalolat. Havoda muallaq turgan kub tasavvuri yaxshi rivojlangan ijodkor insonligingizni bildiradi.
- Agar kubingiz yarimta bo`lsa, sizning ichki olamingiz va hayotga munosabatingiz hali shakllanish jarayonida. Butun kub butkul shakllangan insonni bildiradi. Sizni boshqarish juda qiyin.
Zina – do`stlaringiz.
U do`stlaringiz bilan munosabatlaringiz haqida so`zlaydi.
- Agar zinangiz kubga tegib turgan bo`lsa, muammolaringizni do`stlaringiz yordamida echishni eplaysiz. Ular bilan samimiy va yaqinsiz. Agar kubga tegmay turgan bo`lsa, demak, hammasini o`zingiz qila olasiz, sizga do`stlar yordami kerak emas.
- Bordiyu zina kubdan kichik bo`lsa, do`stlaringiz oldida obro`si baland insonsiz. Teng bo`lsa, do`stlaringizni o`zingiz bilan teng ko`rasiz. Zina kubdan baland bo`lsa, ularning fikri siz uchun juda muhim.
- Yangi zina do`stlaringizning ko`pi yangi ekanini, eskisi esa asosan ko`p yillik do`stlar bilan muloqot qilishingizni bildiradi.
- Zinadagi zinapoyalar soni 3–5 tadan ko`p bo`lsa, siz juda kam insonni o`zingizga yaqin yo`latasiz. Agar ular 10 tadan ko`p bo`lsa, do`stlaringiz kam, tanishlaringiz ko`pligini bildiradi. Pillapoyalar soni haddan ortiq ko`p bo`lsa, siz odamlarni o`ziga tortadigan ochiq insonsiz.
Otumr yo`ldoshingiz bilan munosabatlaringizdan darak.
- Bardam, jigarrang, jaydari otni tasavvur qildingizmi? Demak, sizga suyansa bo`ladigan tog`dek ishonchli umr yo`ldoshi kerak. Agar chiroyli, yaltirab turgan otni ko`rgan bo`lsangiz, demak, tashqi ko`rinish va boylikka ko`proq ahamiyat berar ekansiz. Tasavvuringizdagi shahzodangiz ham kamida allaqaysi kino yoki estrada yulduzi.
- Otingiz kubga yollari bilan suykalyapti yoki uni qirrasidan tishlab olmoqchimi? Demak, yoringiz bilan munosabatlaringiz samimiy va o`zaro ishonch asosiga qurilgan.
- Ot kubdan uzoqda yoki uzoqlashib bormoqda. Demak, siz eringiz/sevganingizga ishonmaysiz, u sizni aldayotgandek tuyulaveradi.
Gullar — sizning farzandlaringiz.
Gullar soni siz dunyoga keltirishni istagan farzandlar soni demakdir.
- Agar siz gullari barq urib yashnayotgan chamanni tasavvur qilgan bo`lsangiz, demak, katta oilaga bosh bo`lasiz. Bordiyu gullar pechakdek chirmashib kubni o`rab olgan bo`lsa, bolalaringiz sizning elkangizga minib olishgan va hamma tashvishlarini sizga ortishadi (bunga tezroq chek qo`yishingiz kerak).
- Gullarning rangi va tashqi ko`rinishi farzandlaringizning salomatligi hamda kelajagidan dalolat.
- Gullarning joylashuvi, ayniqsa, kubga nisbatan joylashuvi sizning farzandlaringiz bilan munosabatlaringizni bildiradi. Yaqin turgan bo`lsa, demak, munosabatlaringiz yaqin va ishonchli, uzoq bo`lsa, nimalarnidir o`zgartirishingiz kerak.
Momaqaldiroq — xavotirlaringiz.
Momaqaldiroq xatarni va sizning xavotirlaringizni bildiradi. Bu insonning ayni damdagi holatini va turli xatarlarga nisbatan munosabatini anglatadi.
- Agar momaqaldiroq juda uzoqda bo`lsa, demak, siz ortiqcha vahimachi emassiz, muvaffaqiyatsizliklarni ko`nglingizga yaqin olmaysiz, shu sababli ular ham sizni ko`pda cheklab o`tishadi.
- Agar momaqaldiroq kubga yaqin joyda gumburlagan-u, ammo unga hech qanday ta`sir o`tkazmagan bo`lsa, siz qiyinchiliklarni oson engib o`tasiz.
- Siz momaqaldiroq kubga, zinaga va gullarga jiddiy ta`sir o`tkazganini, ularni joyidan qo`zg`atganini tasavvur qilgan bo`lsangiz, bu qiyinchiliklar sizni tez engib qo`yishidan dalolat. Bunday daqiqalarda o`zingizga ishonishingiz va har qanday qiyinchiliklarni enga olishingizga amin bo`lishingiz sizga katta yordam beradi.
ShAHLO tayyorladi.
Manba: “SUG‘DIYONA” gazetasi
