Бу ўйин-тестда хаёлингизга биринчи келган нарсани эслаб қолишингиз муҳим. Шу образни хаёлда ушлаб туринг ва икир-чикирларигача кўриб олишга ҳаракат қилинг. Ҳар эҳтимолга қарши жавобларни ёзиб бориш учун ручка ва қоғоз тайёрлаб қўйинг.
Огоҳлантирамиз: бу тест илмий-психологик тадқиқот эмас, уни жиддий қабул қилманг. Аммо натижалардан айрим хулосалар чиқарсангиз бўлади.
Тасаввур қилинг…
…кенг саҳро, тасаввурингиз етганича кенг. Шу саҳрода бир куб турибди…
- Кубни тасвирлаб беринг. У қанчалик катта? Қаерда турибди: қум устидами ёки тагига кўмиб юборилганми? Балки муаллақ тургандир. Ҳаракатланаяптими? Яримтами ёки бутунми? Жавобим тўғри ёки нотўғри деб ўйлаб ўтирманг, муҳими, сиз кубни қандай тасаввур қилаётганингизда.
- Демак, сиз саҳродасиз, кубни кўриб турибсиз, шунингдек, ўша ерда зина ҳам борлигини билиб қолдингиз. Уни хаёлингизда гавдалантиринг. Нимадан қурилган? Қанчалик узун? Эскими ё янги? Кубга нисбатан қаерда жойлашган? Кубдан баландми ё пастми?
- Энди саҳродаги отни кўз олдингизга келтиринг. Уни тасвирлаб беринг. Энг муҳими: от сиздан қанчалик узоқда, у нима қилаяпти? Қайси йўналиш бўйлаб ҳаракатланаяпти? Кўриниши қандай?
- Саҳродаги гулларни хаёл қилинг. Улар қанчалик кўп? Қаерда ўсаяпти? Қандай кўринишга эга? От, куб, зина ва қумга нисбатан қаерда ўсаяпти?
- Момақалдироқ бошланди. Унинг батафсил тасвирини қоғозга ёзиб қўйинг. Шамол кучлими? Момақалдироқ сизга яқин жойда бўлаяптими ёки узоқда? У от, гуллар, куб ва зинага қандайдир таъсир кўрсатаяптими?
Навбат таҳлилга
Энди бу тасаввурларингизни таҳлил қиласиз. Бу жуда осон.
Куб, бу — сизнинг ўзлигингиз.
- Катта куб сизнинг ўзига анча ишонган ва раҳбарликни қойиллатадиган инсон эканингизни англатади. Агар кубингиз кичик бўлса, демак, сиз уятчан ва камтар одамсиз. Тўй-ҳашамларда эътибор марказида туришни ёқтирмайсиз.
- Агар кубни қумга кўмилиб ётган ҳолда тасаввур этган бўлсангиз, ҳар қадамини тўғри ҳисоблаб босадиган тадбиркорсиз. Қум устида турган куб сизнинг ҳаётдан нима исташини биладиган ақлли инсон эканингизни кўрсатади. Агар куб қимирлаб жойини ўзгартираётган ёки айланаётган бўлса, бошқаларга ўхшамайдиган, алоҳида фикрлайдиган инсон эканингиздан далолат. Ҳавода муаллақ турган куб тасаввури яхши ривожланган ижодкор инсонлигингизни билдиради.
- Агар кубингиз яримта бўлса, сизнинг ички оламингиз ва ҳаётга муносабатингиз ҳали шаклланиш жараёнида. Бутун куб буткул шаклланган инсонни билдиради. Сизни бошқариш жуда қийин.
Зина – дўстларингиз.
У дўстларингиз билан муносабатларингиз ҳақида сўзлайди.
- Агар зинангиз кубга тегиб турган бўлса, муаммоларингизни дўстларингиз ёрдамида ечишни эплайсиз. Улар билан самимий ва яқинсиз. Агар кубга тегмай турган бўлса, демак, ҳаммасини ўзингиз қила оласиз, сизга дўстлар ёрдами керак эмас.
- Бордию зина кубдан кичик бўлса, дўстларингиз олдида обрўси баланд инсонсиз. Тенг бўлса, дўстларингизни ўзингиз билан тенг кўрасиз. Зина кубдан баланд бўлса, уларнинг фикри сиз учун жуда муҳим.
- Янги зина дўстларингизнинг кўпи янги эканини, эскиси эса асосан кўп йиллик дўстлар билан мулоқот қилишингизни билдиради.
- Зинадаги зинапоялар сони 3–5 тадан кўп бўлса, сиз жуда кам инсонни ўзингизга яқин йўлатасиз. Агар улар 10 тадан кўп бўлса, дўстларингиз кам, танишларингиз кўплигини билдиради. Пиллапоялар сони ҳаддан ортиқ кўп бўлса, сиз одамларни ўзига тортадиган очиқ инсонсиз.
Отумр йўлдошингиз билан муносабатларингиздан дарак.
- Бардам, жигарранг, жайдари отни тасаввур қилдингизми? Демак, сизга суянса бўладиган тоғдек ишончли умр йўлдоши керак. Агар чиройли, ялтираб турган отни кўрган бўлсангиз, демак, ташқи кўриниш ва бойликка кўпроқ аҳамият берар экансиз. Тасаввурингиздаги шаҳзодангиз ҳам камида аллақайси кино ёки эстрада юлдузи.
- Отингиз кубга ёллари билан суйкаляпти ёки уни қиррасидан тишлаб олмоқчими? Демак, ёрингиз билан муносабатларингиз самимий ва ўзаро ишонч асосига қурилган.
- От кубдан узоқда ёки узоқлашиб бормоқда. Демак, сиз эрингиз/севганингизга ишонмайсиз, у сизни алдаётгандек туюлаверади.
Гуллар — сизнинг фарзандларингиз.
Гуллар сони сиз дунёга келтиришни истаган фарзандлар сони демакдир.
- Агар сиз гуллари барқ уриб яшнаётган чаманни тасаввур қилган бўлсангиз, демак, катта оилага бош бўласиз. Бордию гуллар печакдек чирмашиб кубни ўраб олган бўлса, болаларингиз сизнинг елкангизга миниб олишган ва ҳамма ташвишларини сизга ортишади (бунга тезроқ чек қўйишингиз керак).
- Гулларнинг ранги ва ташқи кўриниши фарзандларингизнинг саломатлиги ҳамда келажагидан далолат.
- Гулларнинг жойлашуви, айниқса, кубга нисбатан жойлашуви сизнинг фарзандларингиз билан муносабатларингизни билдиради. Яқин турган бўлса, демак, муносабатларингиз яқин ва ишончли, узоқ бўлса, нималарнидир ўзгартиришингиз керак.
Момақалдироқ — хавотирларингиз.
Момақалдироқ хатарни ва сизнинг хавотирларингизни билдиради. Бу инсоннинг айни дамдаги ҳолатини ва турли хатарларга нисбатан муносабатини англатади.
- Агар момақалдироқ жуда узоқда бўлса, демак, сиз ортиқча ваҳимачи эмассиз, муваффақиятсизликларни кўнглингизга яқин олмайсиз, шу сабабли улар ҳам сизни кўпда чеклаб ўтишади.
- Агар момақалдироқ кубга яқин жойда гумбурлаган-у, аммо унга ҳеч қандай таъсир ўтказмаган бўлса, сиз қийинчиликларни осон енгиб ўтасиз.
- Сиз момақалдироқ кубга, зинага ва гулларга жиддий таъсир ўтказганини, уларни жойидан қўзғатганини тасаввур қилган бўлсангиз, бу қийинчиликлар сизни тез енгиб қўйишидан далолат. Бундай дақиқаларда ўзингизга ишонишингиз ва ҳар қандай қийинчиликларни енга олишингизга амин бўлишингиз сизга катта ёрдам беради.
ШАҲЛО тайёрлади.
Манба: “SUG‘DIYONA” газетаси
