Fermer xo‘jaligi hududida uka o‘z akasini ov miltig‘i bilan otib o‘ldirgan.
2026 yil 12 fevral kuni soat 11:30 larda Narpay tumani “Ho‘jakarzon” mahallasida joylashgan “Asilbek oltin baliqlari” fermer xo‘jaligida aka-uka o‘rtasida janjal kelib chiqqan. Tergov ma’lumotlariga ko‘ra, A.Saidov ariqdan suv o‘tkazish masalasida akasi U.Saidov bilan tortishib qolgan va janjal vaqtida o‘ziga tegishli “IJ-18” rusumli ov quroli bilan unga bir marta o‘q uzgan.
Sud-tibbiy ekspertizaning dastlabki xulosasiga ko‘ra, jabrlanuvchi og‘ir o‘qotar jarohatlari oqibatida tashqi qon ketishidan vafot etgan.
Mazkur holat yuzasidan 12 fevral kuni Narpay tuman prokuraturasi tomonidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atildi. Gumonlanuvchi Jinoyat-protsessual kodeksining 221-moddasiga muvofiq ushlangan. Tergov harakatlari olib borilmoqda.
