03.12.2013 11:10
O`zbekiston fuqarolarining 91,6 foizi o`z oilalarini mustahkam deb hisoblaydi
So`rovnomada qatnashganlarning 89,6 foizi davlatning oila masalalariga qaratayotgan e`tiborini yuqori baholashini ma`lum qilgan. 90 foizi esa oilalardagi ma`naviyat va ma`rifatni yuksaltirish bo`yicha masalalarni hal qilishda davlatning faol o`rnini qayd etib o`tgan.
So`rovnoma qaysi ijtimoiy institutlar O`zbekiston aholisi orasida ma`naviyatning shakllanishiga eng ko`p ta`sir ko`rsatayotganini ham aniqlab bergan, deya xabar beradi O`zA. Natijalarga ko`ra, oila (86,7 foiz), mahalla (48 foiz), ta`lim muassasalari (52,3 foiz), ijtimoiy muhit (35,9), shuningdek, OAV (25 foiz) ma`naviyatning shakllanishida muhim rol o`ynamoqda.
Tadqiqot davomida respondentlarning 73,5 foizi o`z oilalari farovonligi «yaxshi» va «juda yaxshi» deb baholashgan. So`rovnoma shuni ko`rsatganki, O`zbekiston fuqarolarining 91,6 foizi o`z oilalarini mustahkam va baxtli deb hisoblaydi, ayniqsa, qishloq joylarda bu fikrdagilar soni ko`p.
So`rovnomada ishtirok etganlarning 90 foizining fikricha, ma`nan sog`lom, Vatanga sodiq bolalar hamjihatlik va inoqlik hukmron bo`lgan butun va ahil oilalarda voyaga etadi.
Respondentlarning mutlaq ko`pchiligi oilalardagi ajrashishlar va fuqarolik nikohlariga qarshi ekanligini ma`lum qilgan. O`z oilaviy biznesini ochish haqidagi savolga har uchinchi respondent ijobiy javob bergan. So`rov natijasida O`zbekistonda oilaviy biznesni tashkil etish va yuritish uchun barcha iqtisodiy, huquqiy va ijtimoiy sharoitlar yaratilgani ma`lum bo`ldi.
Fuqarolarning fikricha, O`zbekiston Prezidenti tomonidan oila taraqqiyotiga ko`rsatilgan e`tibor samarasi o`laroq, mustaqillik yillarida samarali oila siyosati amalga oshirilmoqda, oilalarining moddiy ahvoli yaxshilanib, hayot darajasi o`smoqda, ma`naviy-axloqiy qadriyatlar mustahkamlanmoqda.
