Bu haqda Prezident Shavkat Mirziyoev raisligida 20 noyabr kuni bozorlarni qish-bahor mavsumida ham qishloq xo`jaligi mahsulotlari bilan uzluksiz ta`minlash vazifalari ijrosiga bag`ishlab o`tkazilgan yig`ilishda ma`lum qilindi.
Qayd etilganidek, joriy yilda qishloq xo`jaligi mahsulotlarining xaridorgir turlarini takroriy ekish maydonlari sezilarli darajada kengaytirilgan. Sentyabr-oktyabr oylarida takroriy ekindan etishtirilgan qariyb 65 ming tonna mahsulot eksport qilingan. Bu o`tgan yilning shu davriga nisbatan 1,4 barobar ko`pdir.
Yil boshidan buyon meva-sabzavot mahsulotlari 54 mamlakatga eksport qilindi. Bangladesh, Filippin, Suriya, Tayvan, Iordaniya, Makedoniya va boshqa mamlakatlarda yangi bozorlar o`zlashtirildi.
Ichki iste`mol bozorida meva-sabzavot mahsulotlari narxining oshib ketishiga yo`l qo`ymaslik maqsadida Ijtimoiy ahamiyatga ega oziq-ovqat tovarlarining asosiy turlariga narx-navoni monitoring va nazorat qilish respublika komissiyasi tuzildi. Import orqali bozorlarni tanqis va yuqori narxdagi mahsulotlar bilan ta`minlash bo`yicha chora-tadbirlar qabul qilindi. Hududlar kesimida 490 ming tonnadan ziyod qishloq xo`jaligi mahsulotlarining asosiy turlarini kelgusi qish-bahor mavsumi uchun g`amlash parametrlari tasdiqlandi.
