Verner Lipak Osiyo taraqqiyot bankining Markaziy va G`arbiy Osiyo bo`yicha departamenti bosh direktori etib tayinlandi. Undan oldin bu lavozimni Shon O’Sallivan egallab turgandi. Bu haqda OTB matbuot xizmati xabar berdi.
Lipak bosh direktor sifatida O`zbekiston, Qozog`iston, Qirg`iziston, Tojikiston, Turkmaniston, Pokiston, Ozarbayjon, Gruziya, Armaniston, Afg`oniston kabi mintaqadagi 10 davlatda ushbu moliya muassasasi faoliyatini boshqaradi. Jumladan, u ayni paytda OTBning 155 ta loyihasini o`z ichiga olgan 18,6 milliard AQSh dollariga teng portfelini amalga oshirilishini nazorat qiladi.
Qayd etilishicha, yangi bosh direktor, shuningdek, bankning Markaziy Osiyo mintaqaviy iqtisodiy hamkorlik dasturlari doirasidagi ishlariga rahbarlik qiladi. Eslatib o`tamiz, bu Osiyodagi mintaqaviy hamkorlik yo`nalishidagi eng yirik dasturlardan biri hisoblanadi.
“Markaziy va G`arbiy Osiyo ulkan o`zgarishlarni boshdan kechirmoqda. Zero, ushbu mintaqada savdo-sotiq kengayib, qashshoqlik darajasi qisqarayapti, — deb hisoblaydi Verner Lipak. — OTB fizik va ijtimoiy infratuzilmalarning o`zaro bog`liqligini oshirish hamda yaxshilash hisobiga inklyuziv o`sishni ta`minlash maqsadida butun mintaqani rivojlantirish bo`yicha hukumatlar va hamkorlar bilan ishlashni davom ettiradi”.
Bungacha u ushbu departamentda bosh direktor o`rinbosari va bosh maslahatchisi lavozimlarida ishlagan. U 2011 — 2017 yillarda OTBning Pokiston bo`yicha doimiy vakili bo`lgan. Umuman, mazkur muassasada 1992 yildan buyon faoliyat yuritayapti.
Bu sohada 1987 yilda yosh mutaxassis sifatida ish boshlab, uzoq yillar davomida yuqori lavozimlarni egallab kelgan sobiq rahbar Shon O’Sallivan esa nafaqaga chiqdi.
