2018-yilning 2-aprel kuni O`zbekiston Tashqi ishlar vazirligida Xalqaro migrasiya tashkiloti (XMT) Bosh direktori Vilyam Leysi Sving boshchiligidagi delegasiyasi bilan uchrashuv bo`lib o`tdi.
Ayni paytda O`zbekiston XMTga a`zo emas. Mazkur tashkilot vazifasiga migrasiya masalalarini hal qilishda ko`maklashish, ushbu sohadagi xalqaro hamkorlikni rivojlantirish kiradi.
TIVda bo`lib o`tgan suhbat chog`ida O`zbekiston va XMT o`rtasidagi o`zaro hamkorlikni rivojlantirishning istiqbolli yo`nalishlari muhokama qilindi.
O`zbekiston tashkilot faoliyatida to`laqonli a`zo sifatida qatnashish imkoniyatini ko`rib chiqayotganligi XMT delegasiyasiga ma`lum qilindi. Shu nuqtai nazarda o`zaro munosabatlarni mustahkamlash va kengaytirishdan ikki tomon ham manfaatdor ekanligi tasdiqlandi.
XMT delegasiyasining O`zbekistonga tashrifi dasturidan O`zbekiston prezidenti huzuridagi Xavfsizlik kengashi, Hukumati, mehnat va aholini ijtimoiy muhofaza qilish va ichki ishlar vazirliklari hamda bosh prokuraturada uchrashuvlar o`tkazish o`rin olgan.