85 yoshli braziliyalik qariya 64 yil avval harid qilingan final chiptasi bilan joriy yilning 13 iyul kuni “Marakana” stadionida bo`lib o`tadigan JCh final uchrashuviga kiradi.
Braziliya 1950 yili JChni qabul qilgan edi. O`shanda Joedir Belmont final uchrashuvi chiptasini qo`lga kiritgan baxtli futbol muxlislaridan biri bo`lgan. Ammo, u onasining betobligi sababli uyda qolgan va final uchrashuvini o`tkazib yuborgan edi.
Ushbu voqeani u FIFA rahbariyatiga yo`llagan xatiga kiritdi. Shuningdek, Belmont chiptani federasiya muzeyiga topshirishni taklif qildi. Bu haqda “ITAR-TASS” agentligi xabar bermoqda.
Bu voqea esa tashkilot vakillarini befarq qoldirmadi. Ular juma kuni 1950 yilgi final chiptasini joriy yilgi finalning 3 ta chiptasiga almashtirib berishdi.
64 yil avvalgi finalda Braziliya Urugvay terma jamoasiga imkoniyatni boy bergandi. Belmont bu yili uning sevimli Braziliya terma jamoasi g`alaba qozonishidan umid qilmoqda.
