Buxoro viloyatining Romitan tumanida joylashgan “Xo`ja Niyoz Xorazmiy” maqbarasi oldidan oqib o`tuvchi zovurda qurilish ishlari olib borilayotgan paytda suv ostidan X asrga taalluqli “Laq-Laqa” ko`prigi topilgan.
Ushbu ko`prikni tadqiq qilish uchun mutaxassislar chaqirilib o`rganilganda, ko`prik X asrda qurilgani va XVI asrda qayta ta`mirlanganligi tasdiqlandi.
Turizmni rivojlantirish davlat qo`mitasi matbuot xizmatining ma`lumotiga ko`ra, mazkur hududda tadbirkor Nizom Huseynov tomonidan ekoturistik markaz yaratish bo`yicha ham ishlar olib borilmoqda.
Bu erda turistlar kelajakda nafaqat qadimiy ko`prik qoldiqlarini, balki cho`l hayvonlari bog`i, qadimiy uy namunasi va milliy hunarmandlik mahsulotlaridan ham bahramand bo`ladi.
Soha rivoji uchun amalga oshirilayotgan tadbirlar davom etmoqda.