O`zbekiston Respublikasi Oliy Majlisi Senati Raisining birinchi o`rinbosari S.Safoev Rossiya Federasiyasi Federal Majlisi Federasiya Kengashi Agrar-oziq-ovqat siyosati va tabiatdan foydalanish qo`mitasi raisining birinchi o`rinbosari S.Lisovskiy bilan uchrashdi, deb xabar bermoqda O`zA.
Muzokarada ikki mamlakat o`rtasidagi parlamentlararo hamkorlikni mustahkamlashga doir tadbirlar O`zbekiston Respublikasi Prezidenti Shavkat Mirziyoev taklifiga binoan Rossiya Federasiyasi Prezidenti Vladimir Putinning yurtimizga davlat tashrifi doirasida o`tkazilayotgani ta`kidlandi.
Ushbu tashrif strategik muhim yo`nalishlardagi hamkorlikni kengaytirishga xizmat qilishi va ikki tomonlama munosabatlarni mustahkamlashda, jumladan, parlamentlararo muloqotni faollashtirishda muhim omil bo`lishi qayd etildi.
Ikki mamlakat parlamentlari hamkorligining eng muhim yo`nalishlari muhokama etildi.
Turli sohalardagi hamkorlikni nazarda tutuvchi ikki tomonlama hujjatlar ratifikasiyasini tezlashtirish ikki mamlakat o`rtasidagi munosabatlarni yanada jadal rivojlantirishga xizmat qilishi ta`kidlandi.
Shuningdek, uchrashuvda parlament faoliyati sohasida tajriba almashish, jumladan, Oliy Majlis huzuridagi Qonunchilik muammolari va parlament tadqiqotlari instituti bilan Rossiya parlamentining tahliliy bo`linmalari o`rtasida hamkorlikni yo`lga qo`yish masalasiga e`tibor qaratildi.
Parlamentlararo aloqalarni tegishli qo`mitalar va do`stlik guruhlari rahbarlari darajasida faollashtirish imkoniyatlari ko`rib chiqildi.
