12—15 may kunlari Xitoy xalq milliy ozodlik amiyasi vakillari O`zbekiston Qurolli Kuchlar akademiyasida bo`lib, bu erdagi ta`lim jarayonlari bilan tanishdi.
Xitoy Milliy mudofaa akademiyasi siyosiy ishlar bo`yicha bosh boshqarmasi boshlig`i general-mayor Suy Guyjun boshchiligidagi harbiy delegasiyaning O`zbekiston Qurolli Kuchlari akademiyasiga tashrifi davomida harbiy sohaga oid bir qator masalalar bo`yicha tajriba almashildi.
Tashrifdan ko`zlangan maqsad Akademiya professor-o`qituvchilari bilan tajriba almashish, ofiser kadrlarni tayyorlash masalasini o`rganish, Qurolli Kuchlarda o`tkazilgan islohotlar va uning qurilishi bo`yicha o`zaro fikr almashish hamda harbiy qismlardagi jangovar tayyorgarlik bilan tanishishdan iborat bo`ldi.
Uchrashuv davomida O`zbekiston mudofaa vazirining o`rinbosari, Qurolli Kuchlar akademiyasi boshlig`i general-mayor Azizbek Ikramov mamlakatlarimiz o`rtasida harbiy yo`nalishda hamkorlikni yanada oshirish, kadrlar tayyorlashda o`z tajribalarimizni o`rtoqlashish muhim masalalardan biri ekanligini alohida ta`kidladi.
Eslatib o`tamiz, 2018 yilning oktyabrida general-mayor Azizbek Ikramov boshchiligidagi harbiy delegasiya Xitoyga rasmiy tashrifi davomida XXR Milliy mudofaa universiteti rahbariyati bilan uchrashib,ikki mamlakat oliy harbiy ta`lim muassasalari o`rtasida hamkorlikni yanada kuchaytirishga kelishib olgan edi.
Mudofaa vazirligi matbuot xizmati