Toshkent shahridagi muhtasham “Humo arena” majmuasida “Vatanga qasamyod” matni mohiyatini yoshlar orasida keng targ`ib etish maqsadida “O`zbekiston Respublikasiga sadoqat bilan xizmat qilaman!” shiori ostida ma`naviy-ma`rifiy tadbir o`tkazildi.
Unda Mudofaa vazirligi huzuridagi Jamoatchilik kengashi hamda O`zbekiston yozuvchilar uyushmasi a`zolari, taniqli madaniyat va san`at ustalari, Qurolli Kuchlar faxriylari bilan bir qatorda Toshkent shahar mudofaa ishlari boshqarmasi, Toshkent garnizonida joylashgan harbiy qism, muassasalar harbiy xizmatchilari va ularning oila a`zolari, kursantlar, maktab o`quvchilari va chaqiriqqa qadar boshlang`ich tayyorgarlik fani o`qituvchilari ishtirok etdi.
O`zbekiston Respublikasining 2019 yil 5 sentyabrdagi “Xavfsizlik va mudofaa sohasidagi qonun hujjatlari takomillashtirilishi munosabati bilan O`zbekiston Respublikasining ayrim qonun hujjatlariga o`zgartish va qo`shimchalar kiritish to`g`risida”gi qonunining 3-moddasiga muvofiq, “Vatanga qasamyod” matni mazmun-mohiyatini keng targ`ib etish orqali yosh avlodni harbiy-vatanparvarlik ruhida tarbiyalash, ma`naviyatini yuksaltirish
va ularning bo`sh vaqtini mazmunli tashkil etishga alohida e`tibor qaratilmoqda.
Tadbirda so`zga chiqqan Mudofaa vazirligi huzuridagi Jamoatchilik kengashi raisi o`rinbosari Majid Umarov, mazkur kengash a`zosi, kinorejissyor Hilol Nasimov, O`zbekiston yozuvchilar uyushmasi raisining o`rinbosari Nodir Jonuzoq va boshqalar “Vatanga qasamyod” matni yanada takomillashib, mazmunan boyiganini alohida ta`kidladi.
Mudofaa vazirligi tarbiyaviy va mafkuraviy ishlar bosh boshqarmasi tashabbusi bilan o`tkazilgan tadbirda Qurolli Kuchlar markaziy ashula va raqs ansambli konsert dasturi bilan ishtirok etdi.
Qurolli Kuchlar akademiyasi kursantlari “Vatanga qasamyod” matnini o`qib eshittirgach, akademiyaning faxriy qorovul va harbiy orkestr jamoalari o`ziga xos ko`rgazmali chiqishlarni namoyish etdi. Toshkent harbiy okrugi tasarrufidagi harbiy qism harbiy xizmatchilari qo`l jangi usullari yig`ilganlarda katta taassurot qoldirdi.
Mudofaa vazirligi Axborot va ommaviy kommunikasiyalar departamenti
