O`zbekiston Respublikasi Prezidenti Shavkat Mirziyoev 7 yanvar kuni qurilish sohasidagi islohotlarni yanada jadallashtirish bo`yicha ustuvor vazifalarga bag`ishlangan yig`ilish o`tkazdi.
Yig`ilishda qurilish sohasidagi muammo va kamchiliklar keskin tanqid qilindi.
Masalan, O`zbekistonda 22 mingga yaqin qurilish-pudrat tashkiloti bo`lib, ularning aksariyatida ishchilar soni va kasb malakasi to`g`risida ma`lumot yuritilmaydi.
Hududlardagi barcha qurilishlar yagona buyurtmachi xizmati tashkilotlariga topshirib qo`yilgani ko`rsatkichlarga salbiy ta`sir ko`rsatmoqda. Ilg`or xorijiy tajribada qurilish xavfsizligi, sifati va natijasi nazorat qilinsa, bizda barcha kuch va resurslar jarayonni nazorat qilishga sarflanib, sifat ikkinchi o`ringa tushib qolgan.
Davlatimiz rahbari sohadagi kamchiliklarni bartaraf etish, uni zamonaviy asosda rivojlantirish bo`yicha muhim chora-tadbirlarni belgilab berdi.
Loyiha institutlari o`rtasida sog`lom raqobat muhitini yaratish, xorijiy tajriba asosida tenderlar o`tkazishning aniq mezonlarini ishlab chiqish, bu borada elektron tizimni eksperiment tariqasida Toshkent shahrida joriy etish bo`yicha topshiriq berildi.
Qurilish, Moliya, Adliya vazirliklari va boshqa mutasaddi tashkilotlarga joriy yil 1 iyulgacha qurilish korxonalari faoliyatini baholash reytingini ishlab chiqish vazifasi qo`yildi. Ushbu reytingda ishchilar soni va malakasi, bajarilgan ishlar hajmi, soliq va kreditlarning o`z vaqtida to`lanishi kabi mezonlar o`z aksini topadi.
Prezidentimiz shaharsozlik normalari va qoidalarini hamda yagona buyurtmachi xizmati tashkilotlari faoliyatini takomillashtirish zarurligini ta`kidladi.
Sohada axborot texnologiyalaridan foydalanish darajasi pastligi ko`rsatib o`tildi. Jumladan, loyihalarni yaratish, ekspertizadan o`tkazish, qurilishga ruxsat berish, qurilish-pudrat ishlarini masofaviy nazorat qilish jarayonlari haligacha qog`ozda bajarilyapti. Investor va tadbirkorlar uchun qaerda nima qurish mumkinligi haqida ma`lumot beruvchi geoinformasion tizim yo`lga qo`yilmagan.
Shu bois yig`ilishda Qurilish vazirligi, Axborot texnologiyalari va kommunikasiyalarini rivojlantirish vazirligiga tizimni to`liq raqamlashtirish bo`yicha joriy yilda amalga oshirish bo`yicha “yo`l xaritasi”ni ishlab chiqish yuklatildi.
Sohada texnika xavfsizligi talablariga rioya qilinmayotgani, “risk-analiz” tizimi va nazorat yo`qligi oqibatida baxtsiz hodisalar yuz berayotgani qayd etildi. Tegishli vazirlik va idoralarga qurilish sohasida davlat nazoratini butunlay yangicha asosda tashkil etish, mehnat muhofazasini kuchaytirish bo`yicha ko`rsatmalar berildi.
Yig`ilishda kadrlar masalasiga ham alohida e`tibor qaratildi. Davlatimiz rahbari qurilish sohasi uchun mutaxassislar tayyorlash tizimi bugungi kun talabiga javob bermasligini ta`kidladi.
Mehnat vazirligi, Qurilish vazirligi, Oliy va o`rta maxsus ta`lim vazirligiga qurilish sohasida o`rta bo`g`in mutaxassislari va ishchi kasblar klassifikatorini joriy qilish hamda unga muvofiq kollejlarda quruvchilar tayyorlash vazifasi qo`yildi.
Sohaga oid ta`lim dasturlarini yuqori texnologiyalar va innovasion yondashuvlar asosida yangidan ishlab chiqish, bo`lajak kadrlarni zamonaviy loyihalash va dasturiy ta`minot, xususan, BIM (Building Information Modeling) texnologiyalari bilan ishlashga o`rgatish kerakligi ta`kidlandi.
Yig`ilishda muhokama qilingan masalalar bo`yicha mutasaddi rahbarlar hisobot berdi, tegishli chora-tadbirlar belgilab olindi.
