Prezident matbuot xizmatining xabar qilishicha, O`zbekiston Respublikasi Prezidenti Shavkat Mirziyoev 5 mart kuni Evropa tiklanish va taraqqiyot banki prezidenti Suma Chakrabarti boshchiligidagi ushbu nufuzli moliyaviy institut delegasiyasini qabul qildi.
O`zbekiston va ETTB 2017 yilda sheriklikni qayta yo`lga qo`yganini alohida ta`kidlash joiz. O`tgan davrda bankning mamlakat strategiyasi va qo`shma "yo`l xaritasi" qabul qilindi va amalga oshirilmoqda.
Yangi investisiyalar hajmi 1,1 milliard dollarga etib, energetika, issiqlik va suv ta`minoti, kommunikasiyalar, yo`l va uy-joy qurilishi kabi ustuvor tarmoqlarga yo`naltirilgan. Ayni paytda, ETTB kiritgan sarmoyaning uchdan bir qismi xususiy sektor tashabbuslarini qo`llab-quvvatlashga qaratilmoqda.
Toshkentdagi vakolatxonadan tashqari bank Andijonda o`z ofisini ochdi, joriy yilning oxirigacha Urganchda ham ochishni rejalashtirmoqda.
Davlatimiz rahbari ikki tomonlama hamkorlikda bunday yuksak darajaga erishilganida Suma Chakrabartining shaxsiy hissasi va faol sa`y-harakatlarini alohida qayd etdi.
Uchrashuvda uzoq muddatli istiqbolga mo`ljallangan amaliy hamkorlikning ustuvor yo`nalishlari batafsil ko`rib chiqildi.
ETTB prezidenti ushbu etakchi xalqaro moliyaviy tashkilot O`zbekistonda amalga oshirilayotgan islohotlar dasturiga har tomonlama ko`maklashishni davom ettirish hamda sheriklik ko`lamini tubdan kengaytirishga tayyor ekanini bildirdi.
Infratuzilmani modernizasiya qilish, bank sohasi, to`qimachilik va sanoatning boshqa tarmoqlarini rivojlantirish, kichik biznes tashabbuslarini qo`llab-quvvatlash bo`yicha ustuvor loyihalarni ishlab chiqish va ilgari surishga alohida e`tibor qaratildi.
Shuningdek, mamlakatimiz iqtisodiyotiga to`g`ridan-to`g`ri investisiyalar, ilg`or tajriba, bilim va texnologiyalarni jalb qilishga qaratilgan qo`shma tadbirlarning rejasi va kun tartibi yuzasidan fikr almashildi.
