Xabaringiz bor, shu kunlarda Iordaniya poytaxti Amman shahrida Osiyo va Okeaniya mintaqasi uchun boks bo`yicha Tokio-2020 Olimpiya o`yinlari yo`llanmalari masalasi hal etilmoqda.
Kecha, 8 mart kuni ushbu lisenzion musobaqa doirasida besh nafar o`zbekistonlik charm qo`lqop ustalari hal qiluvchi janglarda o`z ishtirokini boshlashdi. Ushbu janglarning ahamiyati shundaki, bu bahslarda g`alaba qozongan bokschilar Tokio Olimpiadasi lisenziyasini qo`lga kiritishadi. Bu haqda Jismoniy tarbiya va sport vazirligi Matbuot xizmati xabar bermoqda.
E`tiborlisi, ikki nafar bokschimiz o`z janglarini o`tkazib bo`lishdi va kutilgan g`alabalar va yo`llanmalarni bizga taqdim etishdi. Dastlab, -69 kg vaznda Bobousmon Baturov xitoylik Kiong Ersun mag`lub etgan bo`lsa, -91 kg: Sanjar Tursunov eronlik Tufan Sharifidan ustun keldi.
Ushbu turnirning kechki dasturidan o`rin olgan bahslarda yana uch nafar bokschimiz yo`llanmalar uchun ringga ko`tarilishadi. Unga ko`ra:
-69 kg: Maftunaxon Melieva — Lovlina Borgoain (Hindiston);
-75 kg: Fanat Qahramonov — Abilxan Amankul (Qozog`iston);
+91 kg: Bahodir Jalolov — Danis Latipov (Bahrayn) janglari o`tkaziladi. Ushbu janglarda hamyurtlarimizga omad tilaymiz va ulardan ham Olimpiya o`yinlari yo`llanmalarini kutib qolamiz.