Shu kunlarda Toshkentda marhum shayx Muhammad Sodiq Muhammad Yusufning “Ochiq xat” kitobi sotuvga chiqishi kutilmoqda, deb yozadi 12news.uz nashri.
Ushbu “Hilol nashr” nashriyoti chop etgan kitob allomaning hayotligi chog`i dunyo yuzini ko`rgan so`nggi asarlardan biri sanaladi. Muallif kitobda keyingi chorak asrda musulmon olamida ro`y berayotgan muhim siyosiy voqealarga ochiq-oshkora munosabat bildirgan.
Shayx Muhammad Sodiq Muhammad Yusuf Buxoro shahridagi Mir Arab madrasasi, Toshkent islom instituti, Liviya islom universiteti kabi nufuzli islom dorulfununlarida tahsil olgan. Ko`p yillar davomida Toshkent islom instituti, O`rta Osiyo va Qozog`iston musulmonlari diniy boshqarmasida ishlab kelgan. So`nggi yillarda islom ma`rifatiga bag`ishlangan ijodiy ishlar bilan shug`ullangan. “Imon”, “Ixtiloflar haqida”, “Din nasihatdir”, “Sunniy aqiydalar”, “Hadis va hayot”, “Tafsiri hilol”, “Oltin silsila” hadislar to`plami kabi ko`plab kitoblarning muallifi bo`lib, mazkur asarlarning aksariyati turli tillarga tarjima qilinib, nashr etilgan.
Eslatib o`tamiz, Shayx xazratlari shu yilning 10 mart kuni yurak xurujidan olamdan o`tgan edilar.
