O`zbekiston24 telekanali O`zbekistonda koronavirusga qarshi kurashish maqsadida barpo etiladigan kasalxonalar haqidagi reportaj tayyorladi. Ko`rsatuvda aytilishicha, koronavirusga qarshi kurashishda dunyo tajribasida alohida tipdagi kasalxonalar qurilishi, o`zini oqladi. Shundan kelib chiqib O`zbekiston Respublikasi Prezidentining topshirig`i bilan mamlakatimizda ham koronavirusga chalingan bemorlar uchun alohida shifoxonalar qurish ishlari tezkorlik bilan boshlab yuborildi.
Unda keltirilishicha, kasalxonalarning uchtasi Toshkent shahrida va Toshkent viloyatida hamda O`zbekistonning boshqa viloyatlarida quriladi. Dastlabki muassasa besh kun ichida foydalanishga topshiriladi.
Yuqori Chirchiq tumanida karantin muassasasini qurish uchun 55 ga er ajratildi. Ikkinchi tibbiyot muassasasi Zangiota tumanida barpo etilmoqda, deyiladi. Ayni paytda Yuqori Chirchiq tumanidagi karantin muassasasida qurilish ishlari bilan bir paytda hayot uchun zarur bo`lgan kommunikasiya tarmoqlarini tortish ishlari ham parallel tarzda olib borilmoqda. Tez orada charter reyslar bilan O`zbekistonga olib kelinadigan yurtdoshlarimiz mana shu erga olib kelinadi.
Davron Hidoyatov, Toshkent shahar hokimining birinchi o`rinbosari:
— Dastlabki konteynerlarga yaqin orada etib keladigan 500 nafar odam joylashtirilishi mo`ljallangan. Yana yangi maydonlarni tayyorlash ishlarini olib boramiz, bu juda tez fursatda qurib bitkaziladi.
Sherzod Hidoyatov, Qurilish vazirining birinchi o`rinbosari:
— Har bir binoga ikkita samolyotga sig`adigan odam joylashtirilishi mumkin. Qatorlar orasida yo`llar bo`lib, ular tibbiyot xodimlarining harakatlanishiga mo`ljallangan. Har bir bemor uchun barcha sharoitlari — kondisioner, televizor, kommunikasiya vositalari bilan jihozlangan alohida uycha qilinadi. Kasallanganlar bu erda uzoq ushlab turilmaydi, shu yaqin atrofda alohida kasalxona quriladi. Tekshirishlarning hammasi sanitar hududda amalga oshiriladi. Kasallik aniqlangan bemor kasalxonaga yuboriladi. Oraliq masofa 150 metrdan uzoq bo`lmaydi.
Shuningdek, reportajda ma`lum qilinishicha, karantin makan bir vaqtning o`zida 10 ming nafar odamni qabul qila oladi. Xitoy bunday kasalxonani 10 kun ichida qurib bitkazdi, O`zbekiston esa 5 kun ichida foydalanishga topshiradi.
Bundan tashqari Toshkentning Chilonzor tumanidagi Arnasoy ko`chasida yana bir kasalxona foydalanishga topshiriladi va poytaxtdagi uchta klinika COVID-19 ga qarshi kurash uchun qayta jihozlanadi. Zangiota tumanida ochiladigan kasalxona loyihasi uch kun ichida ishlab chiqilgan bo`lib, unda har biriga 5000 nafardan odamni sig`dira oladigan ikkita korpus, shuningdek, tibbiyot xodimalari uchun yashash joylari, reanimasion bo`limlar va karantin uchun maxsus xonalar bo`ladi.
