Xabaringiz bor, mamlakatimizda koronavirus infeksiyasi tarqalishini oldini olish hamda nazoratdan chiqarmaslikni ta`minlash maqsadida joriy yil 6 apreldan “o`zini yakkalash” hayot tarzi Nukus va Toshkent shaharlari hamda viloyatlar markazlarida majburiy ravishda joriy etilgan.
"O`zini yakkalash" hayot tarzida oziq-ovqat mahsulotlari xaridi bo`yicha "O`zbekoziqovqatxolding" 5 muhim tavsiya berdi:
* Oziq-ovqat mahsulotlarini uzoq muddatga, ortig`i bilan sotib olish shart emas, boisi savdo shahobchalarimiz etarli darajada zaxiraga ega.
* Tez buziluvchan mahsulotlarni keyinroqqa qoldirib, asosan xona haroratida yaxshi saqlanadigan oziq-ovqat mahsulotlarini sotib olgan ma`qul. Asosiysi, mahsulotning yaroqlilik muddati, qadoqning nuqsonsizligi va tarkibini tekshirib olish muhim.
* Onlayn buyurtma qanday tarzda etkazib berilganligini tekshirish zarur. Tez buziluvchan oziq-ovqatlar muzlatkich-xaltasi yoki termopaketda saqlangan bo`lishi kerak. Agar bu qoidaga rioya qilinmagan bo`lsa, buyurtmani ikkilanmay qaytaring.
* Do`konga yo`l olayotganda shaxsiy gigiena qoidalarini unutmang! Agarda qo`lingizda qo`lqop bo`lmasa, aravachalarni va savatchalarni spirtli sochiqlar bilan artish kerak. Onlayn xaridlarda esa mahsulotlarni ochishdan oldin qo`lni albatta sovun bilan yuvish zarur.
* "O`zini yakkalash" hayot tarzida ko`proq meva-sabzavot, oqsilga boy mahsulotlarni iste`mol qilgan ma`qul. Bunday ovqatlanish immunitet oshishiga yordam beradi hamda ortiqcha vazndan saqlaydi.
