Prezident Shavkat Mirziyoev 21-22 may kunlari Andijon viloyatiga tashrifi davomida ichki turizmni rivojlantirish, xususan, Xonobod shahrini turizm markaziga aylantirish bo`yicha ko`rsatma bergan edi.
Davlat rahbarining topshirig`idan kelib chiqib, Bosh vazir o`rinbosari, Turizmni rivojlantirish davlat qo`mitasi raisi Aziz Abduhakimov boshchiligida Xonobod shahrini Farg`ona vodiysining turizm markaziga aylantirishga doir tegishli ishlar olib borildi.
Aziz Abduhakimov Andijon viloyatidagi qator turizm ob`ektlari holati bilan tanishdi hamda Xonobod shahri hokimligi, turizm yo`nalishida faoliyat olib borayotgan tashkilotlar vakillari, tadbirkorlar bilan uchrashdi.
Hokimlik, tegishli tashkilot va idoralar vakillaridan iborat maxsus ishchi guruh Xonoboddagi turistik ob`ektlar holatini o`rganib chiqdi. Hududning pandemiyadan keyingi davrda sayyohlarni qabul qilishga sanitar-gigienik tayyorgarligi masalasiga alohida e`tibor qaratildi.
Pandemiya davri tugashi bilan turizm xizmatlarini yo`lga qo`yishga oid ishlar Andijon viloyati kesimida ishlash uchun shay holatga keltiriladi va rasman ruxsat berilgan kundan e`tiboran faoliyat yuritishni boshlaydi. Bu esa viloyatdagi 43 ziyorat va madaniy meros ob`ekti, 5 sanatoriy, 375 kafe, restoran va 125 choyxona faoliyat ko`rsatishi va asosiysi - 12 mingga yaqin aholining ish o`rinlari qayta tiklanishini ta`minlaydi.
Ta`kidlash joizki, boshqarma vakillaridan iborat yana bir guruh ayni paytda Xo`jaobod tumanidagi Imom ota qishlog`ini turizm qishlog`iga aylantirish, qo`shimcha turistik xizmatlarni tashkil etish bilan shug`ullanmoqda.
