Bugun, 11 iyul kuni Surxondaryo viloyatining Angor va Qiziriq tumanlariga yangi hokim tayinlandi. Bu haqda viloyat axborot xizmati xabar berdi.
Xabarga ko`ra, Xalq deputatlari Angor tumani Kengashining navbatdan tashqari sessiyasida tuman hokimi Usmon Turapov vazifasidan ozod qilindi. U viloyat hokimining qishloq va suv xo`jaligi masalalari bo`yicha o`rinbosari etib tayinlandi.
Shu kungacha viloyat Iqtisodiy taraqqiyot va kambag`allikni qisqartirish bosh boshqarmasi boshlig`ining birinchi o`rinbosari lavozimida ishlab kelgan Shohjahon Abdullaev Angor tumani hokimi etib tasdiqlandi.
Ma`lumot o`rnida, Shohjahon Abdullaev Bekmuratovich 1987 yilning 19 yanvarida Oltinsoy tumanida tug`ilgan. 2009 yilda Termiz davlat universiteti, 2020 yilda O`zbekiston Respublikasi Prezidenti huzuridagi Davlat boshqaruvi akademiyasini tamomlagan.
Shuningdek, Xalq deputatlari Qiziriq tumani Kengashining navbatdan tashqari sessiyasida tuman hokimi Olim Muhammadiev vazifasidan ozod qilindi.
Shu kungacha viloyat ichki ishlar boshqarmasi boshlig`i o`rinbosari lavozimida ishlab kelgan Ilhom Yusupov Qiziriq tumani hokimi etib tasdiqlandi.
Ma`lumot o`rnida, Ilhom Yusupov Elmurodovich 1977 yilning 14 iyunida Sherobod tumanida tug`ilgan. 1998 yilda O`zbekiston Ichki ishlar akademiyasi, 2015 yilda Ichki ishlar akademiyasining Oliy akademik kursini tamomlagan. Ma`lumoti bo`yicha mutaxassisligi - huquqshunos.
