Маълум қилинишича, биткоин нархи 72,9 минг долларгача тушган бўлиб, бу АҚШда 2024 йилги президентлик сайловларида Дональд Трамп ғалаба қозонганидан бери қайд этилган энг паст кўрсаткич ҳисобланади.
Трампнинг сайловдаги ғалабасидан кейин криптовалюталар бозорида кескин ўсиш кузатилган, инвесторлар янги президент рақамли активларга нисбатан ижобий сиёсат юритишига умид қилган эди. Натижада биткоин ва бошқа криптовалюталар бир неча бор тарихий рекордларни янгилаган. Бироқ вақт ўтиши билан бозор пасайишга юз тутди ва олдинги ўсиш деярли тўлиқ йўқолди.
Сўнгги 24 соат ичида биткоин 2,8 фоизга арзонлаган, бир ҳафта давомида эса унинг қиймати 14 фоизга пасайган. Тошкент вақти билан соат 13:00 ҳолатига кўра, биткоин тахминан 76,4 минг доллар атрофида савдо қилинган.
Қайд этилишича, 2025 йил 6 октябр куни биткоин тарихий максимум — 126 минг долларга етган эди. Ўшандан буён унинг нархи қарийб 40 фоизга пасайган.
Шу билан бирга, криптовалюталар бозорининг умумий капиталлашуви сўнгги 24 соат ичида 2 фоизга қисқариб, 2,59 триллион долларга тушган.
