Ҳозирги кунда смартфонларсиз ҳаётимизни тасаввур қила олмаймиз. Уларнинг қулайликлари кўпайган сари унга талаб ҳам ошиб бормоқда. Айниқса, смартфонларни камерасиз тасаввур қилиш мушкул.
Яқинда “Sony Semiconductor Solutions Corporation” компанияси янги камерали смартфонни омма эътиборига ҳавола қилди. Янги смартфон 19,3 мегапиксель тиниқликка эга бўлиб, бир сонияда худди шу тиниқликдаги 1920 х 1080 суратлардан 960 та олиш имкониятига эга. Бу ҳозиргача яратилган камераларнинг сўнгги модели бўлиб қолмоқда. Бу қурилмани яратишда энг сўнгги технологиялардан фойдаланилди ва аъло даражадаги натижага эришилди.
— Биз бу қурилмани яратишда жуда кўп меҳнат қилдик ва етук натижага эришдик, — дейди компания мутахассисларидан бири. — Бу смартфон камераси замонавий технологиялар асосида яратилди ва бемалол айта оламанки, унда ҳеч қандай нуқсон мавжуд эмас. Бизлар одамларнинг яхши кунларини тиниқ-равшан ҳолда эслашларини ва янги технологиялар асри имкониятларидан баҳраманд бўлишларини истаймиз. Янги қурилма яқин кунларда сотувга чиқарилиши кутилмоқда ва бу компания билан кўпчилик машҳур фотостудия раҳбарлари истиқболли шартномалар имзолашга эришганлиги таъкидланмоқда.
